Osofaia se tamā 84 tausaga e se taifau i Wainuiomata

Na vilivili le uila vilivae a lenei tamā e pei ona ia masani ona faamalosi tino ai i aso uma. Ina ua taunuu atu i se nofoa ona tu ai lea lana uila e malolo ai. Na ia vaaia se tamaitiiti o savavali ma lana taifau (Labrador) e leai se filifili na nonoa ai. Na oo mai le taifau ma sogisogi i le uila ma foliga e lē taufeai. O le taimi na vili ese ai le uila a si toeaina e faaauau lana faamalositino ae toso loa i lalo e le taifau le vae agavale o le ofuvae ma osofaia loa. Na u le nofoaga (tulou) ma manu‘a tigaina ai si toeaina.

O se tama talavou na vili atu lana uila na laveai i si tamā ina ua faalogo atu ua faataio mai e manaomia se fesoasoani. Ae na faato‘ā tago le tamaitiiti fusi le filifili o lana taifau ina ua uma lana osofaiga.

O le mea e faanoanoa ai ona na fesiligia e le toeaina le igoa o le tamaitiiti ma lona tuatusi ae na ta‘u sese i ai e le tamaitiiti.  Na o atu leoleo i le fale na ta‘u ane e leai se tagata faapea i lea tuatusi.

Na sulu si toeaina i le aiga na lata ane e vili ai le taavale a le falemai (ambulance), e ave ai ia mo se togafiti o ona manu‘anu‘a.

Ua mae‘a ona logo le tamaitai pule o le Ofisa o Meaola o Jane Schuiteme ina ia faafesootai lē e ona lea taifau. Na tusia le faafetai a lenei tamā mo si tama talavou na laveai ia te ia i luga o le nusipepa o le City Life. Lelei tele le autalavou e faapea le loto fesoasoani.

Ae ese le leaga o le tamaitiiti ae talapepelo. E aogā foi lenei tala ina ia faautagia mai e le fanauiti tulaga saogalemu e ao ona tausisi i ai pe afai e o e faasavali taifau. Ia tautuana foi e ta‘u sa‘o le igoa pe a fesiligia auā e  lē faapea e pepelo e lē maua e leoleo. E telē atu le sala e totogi pe a talapepelo.