Uluai tuufaatasiga a le Aiga o Auvaa
28/01/12 || Tusia: Niumaana Lavea ||
Uluai Reunion Puletuu ma Malia Auvaa o Falealupo
E toafitu alo o le tamā ia Puletuu ma le tina ia Malia Auvaa, sa pei ua toe mafuta i aso ma tausaga ua mavae i totonu o le aiga, ma le afioaga i Falealupo ina ua toe faapotopoto, ma fesagisagiai, i le faamoemoe sa fuafua mamao, ma sa faamoemoe i le Atua, ina ia faataunuina.
Sa aofaga faatasi le aiga mo le tuufaatasiga tele muamua sa faia i Aukilani, mai le aso 27 e oo i le aso 30 o Tesema 2011.
O loimata o le fiafia, ma loimata o le faanoanoa ina ua feiloai, na vaaia i le uluai feiloaiga, e pei ona faamatalaina, ona o le toatele o suli ma sui o le aiga, faato‘ā toe fetaui lea ma toe feiloai talu mai se vaiaimi umi.
Sa faamaonia mai e le susuga ia Faasoooletalalelei Auvaa, o se tasi o alo o le afioga ia Puletuu ma le faletua ia Malia e faapea, o se tasi lea o uiga ‘anoa ma le tāua o tuufaatasiga faapenei, e lē gata ina tapenaina ai finagalo o tagata taitoatasi, ae o se mafutaga faaleaiga e pei ona sa masani mai ai, a o lei malaga ese mai ma tuua le atunuu pele.
E lē gata i lea, a o le talutalu fou ma tupulaga fai a‘e o le aiga sa soifua a‘e i atunuu i fafo, ina ia feiloai ma mafuta ma faailoa i ai le aa moni ma le tupuaga o le aiga. O nisi ia o mafuaaga tāua sa mafua ai ona tulituliloa lea miti ma lea foi fuafuaga aogā.
O alo o le afioga ia Puletuu ma Malia o Falealupo e pei ona ta‘ua, e toalima tamaitai ae toalua alii.
O le susuga ia Faasoooletalalelei Auvaa, o loo avea o se Faafeagaiga taulagi a le ekalesia Papatiso i Grey Lynn i aukilani, ao ia foi o le Toeaina o le Ekalesia Samoa, i Niu Sila ma le Pasefika.
O le isi ona uso, o le susuga ia Lino Auvaa, o loo galulue foi i le galuega a le Atua i le ekalesia Katoliko.
O tamaitai e toalima o Monika, Kalameli, Meleseke, Ana-Maria, ma Serafina.
O i latou ia faatasi ai ma a latou fanau sa auai ma faataunuuina le Reunion muamua a le aiga, ma o le a faaauau pea, o se sauniga tāua a le aiga mo le lumanai, e pei ona saunoa i ai le susuga i le Faafeagaiga ia Faasoooletalalelei Auvaa.
O Samoa, Tutuila, Ausetalia, Hawaii, Amerika ma Niu Sila ua tatala i ai alo ma fanau a le aiga ina ua uluola ma faatoateleina le aofai.
O atunuu foi ia sa malaga mai ai suli uma o le aiga, mo le molimauina ma auai i le uluai mafutaga sa faataunuuina.
