So‘a le faleoloa o Kirkcaldie and Stains i Ueligitone e le taavale a ni tina matutua

O le itula e 2.30 i le afiafi o le Aso Faraile, 20 o Ianuari na patatu ai le faleoloa e pei ona ta‘ua i luga e se taavale na aveina e se tina matua, a o taumafai e paka i se paka mo tagata lē atoatoa le malolosi (Disabled parking).

E faapea e toalua ni tina matutua, o le tasi e 98 ona tausaga sa i totonu o le taavale. Na matuā taalili le pa‘ō o le faleoloa ma taei faamalama ma telē se leaga o le taavale, ae laki e leai se tele o ni manu‘aga o ia tina matutua.

Na ta‘ua e le alii satini o Andy Gilbert e faapea o le mafuaaga o le faalavelave o le lē mau o taofi o le taavale na faaalia e le tina matua sa i le foeuli.

O le faalavelave na tupu na lavea ai ma se tasi tamaitai na tu ai i le vaega lea o le faleoloa, ae lē o ni manu‘aga matuia. O loo ua i aao nei o leoleo lea faalavelave, ma e faafetaia e leai se isi na maliu ai.

E aogā foi lenei tala e fai ai se a‘oa‘oga mo o tatou tina matutua o loo taumafai pea e ave taavale, ina ia siaki lelei vaega uma o taavale mo le saogalemu, aemaise le siaki o le soifua maloloina poo lelei pea mo le aveina o taavale i luga o auala.