Maua le tino maliu o Albert Alapati, Faafetai faafetai tele

E pei ona silafia sa tusia lenei faalavelave i la tatou nusipepa i le vaiaso ua tuanai. O lenei la ua maua le tino maliu sa tau sailia pea i le Aso Faraile 20 o Ianuari, talu mai na leiloa Albert i le aso 14 o Ianuari, ma e avea lenei itulau ma avanoa e faaoo atu ai le faamalo ma le faafetai tele a nai ona mātua ia Alipa ma Laupule aemaise aiga na lua i le Ofisa o le Saili ma Laveai (Search and Rescue), Kalapu o faase’ega (Surf Club), Ofisa o Leoleo, uo ma e masani ona o le galuega mae’a ma le fita na gasea ai ma olooloia i le sa’iliga o le tino maliu o le atalii. O lenei ua tali mai talosaga e ala i lo outou mata’alia finau ma le faamaoni i le sa’iliga auiliili o Albert, ma ua maua ai lona tino.

Ia saga faamanuia atu le Atua ia outou galuega ma faiva o galulue ai mo le tautuaina o Niu Sila aua le  soifua lelei o tagata uma.

O le lotu faaleaiga o le atalii o le a faia i le EFKS i Cannons Creek i le Aso Lulu 25 o Ianuari. O le 10 i le taeao o le Aso Tofi 26 o Ianuari ona sauniga faamavae ma teuina ai lona tino maliu i Whenua Tapu.

Avea foi lenei itulau e faaoo atu ai fautuaga faifai pea mo le fanau ina ia faaeteete i le ogasami e taeele ai ma ia aua ne‘i galo mātua le siakiina pea o le saogalemu o le fanau. E faapena foi i le ‘aufaifaiva ina ia fagogota ma le faaeteete i lea vaega o le sami i Titahi Bay, ona sa iai foi se isi tamā Tokelau na malemo ai a o fai se faiva i ni tausaga se tele ua mavae, ma e oo mai lava i le taimi nei e lei maua lava lona tino.

E faamaise atu ai foi le Sooatulau ma le Samoa Times i mātua faavauvau faapea aiga na lua, uo ma ē masani a Albert.