Fusuaga i le falepia ma manunu‘a ai i se agaese
26/01/12 || Tusia: Leautuli Malaeta Sauvao ||
O le falepia i Wainuiomata i le Laumua, o Fitzroy Tavern na faia ai se misa ma manu‘a ai William Puohotama i ni manu‘a i se agaese ma auina atu i le falemai e tusa o le 10.30pm i le Aso Tofi 19 o Ianuari. E iai foi ma se tasi taulealea na manu‘a ai ae lē tigaina.
Ua toe tatalaina i tua le alii o Tumu Maata na faapogai i le misa e faatali ai lona toe tulai i le faamasinoga i le masina o Fepuari.
O le falepia (bar) lea na tupu ai le misa, e fai ma fale o tafaoga a le toatele o tagata o le vai aai o Wainuomata, ma na ta‘ua e se tasi o tamaitai na iai i le taimi o lea misa, o le taimi muamua lea ua tupu ai se misa faapea i lea falepia.
E fautuaina ai pea le toatele o si o tatou atunuu o loo fai ma a latou tautoga nofoaga faapea ina ia faaeteete mai tulaga faatupu faalavelave, ona e toatele tagata e afaina ai pe afai e manu‘a se tagata e tasi, pe oo atu foi i se tulaga matuia ma uma ai le soifua, e lē pule ai se tagata ola vaganā le Atua.
