Faateleina le osofaia o taavale i totonu o fanua o aiga
26/01/12 || Tusia: Leautuli Malaeta Sauvao ||
E fā ni aiga ua osofaia e le ‘aufaaleaga taavale i totonu o Papakowhai ma Porirua i le vaiaso e tasi. O se tasi o aiga na osofaia taavale e lua e eseese po na faia ai lea galuega lē taupulea e tagata i le vaiaso lava e tasi.
O le isi taavale na maua i ai se agaese i totonu e lē taumate sa faaaogāina e tatala ai le taavale pe sa faamoemoe foi e osofai ai se isi e mauaina le ‘augaoi.
O se tasi o aiga i Papakowhai na latou faapipiia se mea pueata i le latou faletaavale ina ua osofaia foi la latou taavale i le masina o Tesema.
O le meapueata lenei na maua ai le ata o se tamaloa (palagi) e fai na o totini i lima ma vae i le po o le Aso Lua 17 o Ianuari. O le po lava lea na gaoia ai le taavale o le ituaiga o le Suzuki a le latou tuaoi. Manaia le mataalia o lea aiga i le pueina o gaoi.
Na tuuina atu lenei ata i le ofisa o leoleo ma o loo faasalalauina lenei video footage i luga o le dompost.co.nz. ina ia maua ai le gaoi.
O le fautuaga foi a la tatou Sooatulau ina ia nofouta aiga uma i tulaga faapenei auā e lē taugofie taavale pe afai e faaleagaina pe gaoi foi. Ia loka le faitotoa o le pa pe afai e i totonu o le fanua lau taavale. Ia fai ni meapueata e maua ai le ‘aufaaleaga ma le ‘augaoi.
Fesili i le Ofisa o Traffic and Transport ma le Ofisa o Leoleo mo ni a latou fesoasoani.
