Faapaia togiga aufaipese EFKS Le Lamepa a Longan West

Ia outou pepese atu ia Ieova i le pese fou, le lalolagi uma e, ia outou pepese atu ia Ieova. Ia outou pepese atu ia Ieova, ia outou faafetaia lona suafa, ia outou tala‘i atu lana faaolataga i lea aso ma lea aso. (Salamo 96:1&2).

O se agaga faafetai lea o le Susuga i le faafeagaiga ia Rev Perelini Tauilo ma le Ekalesia EFKS Longan West ina ua mae‘a faapaiaina le latou togiga mo le faigame a le Pulega i le Aso Sa aso 4 o Tesema.

E tele fita o le ala sa feagai peitai na laavale ona o le aao alofa o le Matai Sili i le lagi. Faafetai!

O lana auauna ia Rev Perelini sa fai ma sui o faafeagaiga e 10 o le pulega a Saute e folafola se upu faamalosi i sauniga o le faigame o lenei tausaga 2011 ma faapea ona lagiina ai foi viiga mālie e le aufaipese.

O le taeao o le Aso Sa 11 o Tesema na faapaiaina ai le togiga ma faapea ona faia ai se taumafataga tele e faafetaia ai le agalelei o le Atua ona o Lana taitaiga i le savaliga mai lenei tausaga umi ua tauau ina mou atu i le vaai.

O lenei faamoemoe sa faataunuuina ma le manuia e ala i le agaga galulue faatasi o Tupu ma Tamalii, Tiakono faapea faletua ma tausi, le autalavou ma ē mautofi o le Ekalesia aemaise o le Faifeau nofo aiga ia Faafetai ma Mary.

O le Taitai Pese Tama o Faumuina Perelini, Taitai Pese Tina o Faafili Topeto Faiaoga Faipese: Masalo Selesele faapea le tamaitai o Deana Tauilo, o le faafeagaiga EFKS a LE  LAMEPA Longan West: Susuga ia Rev Perelini ma le faletua ia Tili Tauilo

Na saunoa lana auauna, “A mae‘a se galuega ona tatou faapea ane o i tatou lava o auauna lē aogā.”

Tau ina ia manuia laasaga uma ma fuafuaga o lenei aufaipese mo le lumanai ma ia saga faamausaliina ai pea le soifua tapuai mo le Atua ma lona finagalo.

Manuia le Kirisimasi ma le tausaga fou i Toeaiina ma Faafeagaiga ma faletua faapea Ekalesia EFKS uma i Ausetalia, Niu Sila ma le lalolagi atoa.

Alofaaga mai ia Rev Perelini ma Tili Tauilo, le nofoaalo ma le Ekalesia Le Lamepa Longan West i Brisbane.