Faamanatuina le 45 tausaga o le Ekalesia PIPC i Porirua

O le Aso Toonai 3 ma le Aso Sa 4 o Tesema o ni aso faapitoa le matagofie i le faamanatuina o le 45 tausaga ole Ekalesia. Na toe taliu mai ai alo o le Ekalesia: Rev. Elder Maafala Koko mai le PIPC Newton, Aukilani, Rev. Fakaofo Kaio (Moderator o Aukilani i Matu) ma le faletua ia Ruta Kaio, Rev. Alofa Lale mai Dunedin e auai faatasi ma le Ekalesia atoa i le faailogaina o lona aso fanau.

Sa auai mai foi le susuga i le faafeagaiga Rev. Tauinaola Tofilau ma le faletua ia Tiute. Malo lava le lagolago mai!

Na felanulanuai le matagofie o faafiafiaga mai vaega e tolu o le Ekalesia sa latou faatinoina faafiafiaga faa-Toelau, Atu Kuki ma Samoa i le afiafi lea o le Aso Toonai, ae o le taeao o le Aso Sa, na ta‘ita‘i ai le sauniga e le afioga i le Moderator Rev. Perema Leasi, ae laugaina le upu folafola e le susuga i le Toeaina ia Maafala Koko.

O le susuga i le Moderator ia Rev. Fakaofo Kaio na saunia le tatalo, ae o le susuga ia Rev. Alofa Lale na saunoaina le tala mo le fanau ma le faitauina o le Tusi Paia. O le susuga ia Rev. Falkland Liuvaie na saunia le tatalo e manatua ai i latou ua afemoe le folauga e ala i le maliu ma le oti ma ua lē auai faatasi i le faailogaina o le 45 tausaga o le ekalesia.

O se sauniga na toatele na maligi loifofoga ona o le toe manatuaina o mātua, uso ma tuagane aemaise uo ua lē aulia le aso faamoemoeina.

O le puega ata atoa o tagata uma na faia ina ua mae‘a le faamanatuga paia ma faagasolo atu ai i le maota o le Ekalesia PIC House mo le toonai matagofie tele ma le lava saunia. Na faaiu foi le toonai i saunoaga taumavae e pei ona masani ai ma foai ai foi meaalofa mo le mamalu o le aufaigaluega sa faatasi uma ai.

E faamalo ai foi i le vasega o tiakono talavou sa tofia e komiti mo le faamoemoe, o le Fofoga o le Ekalesia Lio Paese aemaise lava aiga uma o le ekalesia na faatinoina lea faamoemoe tele, ua iu manuia. Ia i le Atua e toatasi pea lona viiga e le aunoa!

Manuia lava lou 45 tausaga PIPC Porirua!