Faauuga Aoga Tusi Paia ‘Ia Malamalama AGAPE Bible College’ i le Laumua
13/12/11 || Tusia: Leautuli Malaeta Sauvao ||
Le High Commissioner tuai, Tuiataga Asi James Blakelock i lona faauuga, ma lona sui fou lea ua iai nei i le laumua, le susuga ia Hele Matatia, ma le tina ia Leautuliilagi Sauvao
O le Aso Sa na tea nei, aso 4 Tesema 2011, na Atu ē ai le ‘au tautai ina ua a‘e manuia faiva o le sailiga o le atamai i le afioga a le Atua. Ua tonu ai upu a le atunuu: O le faamoemoe ua taunuu o le laau lea o le soifua.
Na matuā faatumulia le Te Rauparaha Arena, le maota pito tele i le aai o Porirua i le mamalu o le ‘auvalaaulia aemaise aiga, uo ma le ‘aufaigaluega paia a le Atua e molimauina le ‘aufaauu, o ē na faamanuiaina o latou taumafai i Tipiloma o le Associate of Arts ma le Bachelor of Arts degree in Theology.
E to‘a sefululua i latou na tau le faamoemoe ma faamanuiaina i le faailoga o le Bachelor of Arts in Theology: Ana Schuster, Amosa Muliaga, Asolelei Vanilau, Fogavai Sataraka, Folole Li‘o, Isaako Schuster, Mandy Muliaga, Naomi Lemafua, Naomi Masaga‘ape, Talosaga Vanilau, Tavita Lafaele, Tutuila Masaga‘ape.
E to‘a luasefululima na maua le tipiloma o le Associate of Arts: Tuiataga Asi James Blakelock (Komesina Sili o Samoa), Alofagia Tuma‘ai, Fealofani Filifili, Fofo Filifili, Iafeta Tautasi, Ipu Siava, Isitolo Collins, Italia Sefo, Joe Tuiletufuga, Kaleta Fetuiai, Kitiona Kereti, Margaret Lua‘ai, Mark Ale, Poasa Samuelu, Poualae Samuelu Li‘o, Puaseisei Su‘a, Risale Su‘a, Risti Punefu, Ruta Feterika, Taape Falesefulu, Tafa I. Masinalupe, Fiatala Tauasa Siava, Temukisa Ioane, Tumua Peniata, Uaealesi Filipo.
O Puaseisei Su‘a na mauaina maka maualuluga o le Tipiloma i le Associate of Arts in Theology, tulua; Tafa Iosefa Masinalupe ae tutolu; Poualae Samuelu Li‘o. O latou foi ia ua mauaina sikolasipi mo le toe a‘oa‘oina mo le faailoga B.A in Theo.
O le sikolasipi mo tausaga e lua e aoga fua ai ua maua lea e Puaseisei Su‘a a o sikolasipi e tolu mo le tasi le tausaga e aoga fua ai ua maua lea e Tafa I. Masinalupe, Poualae S. Li‘o ma Risale Su‘a, ae totogi e latou ia le isi tausaga mulimuli o le faailoga.
A o le sikolasipi faapitoa na maua e le faafeagaiga ia Pastor Kitiona Kereti mo le galue faamaoni i soo se tulaga tau i le aoga, tala‘iga o le finagalo o le Atua ma le tausaafia naunautai e maua ni agaga mo le Alii.
O Tauasa Fiatala Siava na faamanuiaina i le sikolasipi mo le aoga fua i le tasi foi le tausaga. Na saunoa le pule aoga atonu e maua mai se isi sponsor mo le isi tausaga e aoga fua ai lea tamā mai le aoga.
Na saunoa le Ao E‘e Asi James Blakelock ina ua fesiligia e le sui o le Samoa Times, pe toe faaauau lona faailoga (B.A. in Theo), ae na ia saunoa; o le a taumafai mai lava i Samoa lona faailoga ona o lea o le a foi i Samoa ua uma lona taimi na tautua ai faakomesina.
O ana pepa foi o le Tipiloma sa fai lava i luga o le Upega o Fesootaiga (online study).
O latou ia ua maua le tipiloma o le Associate of Arts o le a toe sauni nei mo le isi lua tausaga e faaauau ai le faamae‘aina o le Bachelor of Arts in Theology.
E toalua isi na malaga mai le lala i Sini e faauu ai, o Joe Tuiletufuga ma Mark Ale. O tagata aoga e mai le AOG, ma le Full Gospel vaganā ai le afioga i le Ao E‘e ia Tuiataga Asi Blakelock (Komesina Sili) ma le afioga i le tiakono a le PIPC ia Naomi Lemafua.
O Naomi Lemafua na amata mai lona taumafai i le Pacific Bible College i Ueligitone, na maua ai iinā lona tusi pasi ma lona tipiloma o le Tusi Paia, ae o lona faailoga lea na faaauau ona a‘oa‘oina ai i le Ia Malamalama AGAPE Bible College (IMABC).
E tusa e lima tausaga lea ua iu manuia ai le taumafai i le mauaina o le faailoga, BA(Theo) e le afioga i le Tiakono.
O le Ia Malamalama AGAPE Bible College (IMABC) o loo faauluulu i le susuga i le faafeagaiga Rev. Dr. Benjamin Williams (Principal) ma o le susuga i le pule o le kolisi lala i Hawaii Rev. Dr. Ieti Mageo na la toalua i le tauaaoina o faailoga. Malo le saili malo i le finagalo o le Atua.
Na matuā faamalieina le aofia i le upu folafola na feagai ma le Taitai o le Samoan AOG i Niu Sila, le faafeagaiga ia Rev. Aila‘ula‘u Faletutulu ma sa toe faaopoopo foi i le timaiga o le ‘aufaauu le Fomai mai le lala i Hawaii Rev. Dr. Ieti Mageo.
O le Maota o le Ekalesia AOG i Castor Cres, Porirua na toe faatasi atu i ai le aofia mo le taumafataga lava saunia, ma toe saunoaga faamavae o le aso fiafia o le ‘aufaauu.
Mo le silafia e le mamalu o le atunuu, e talia soo se tasi mai soo se ekalesia e fia ulufale i le Aoga ma e faia i le Gagana Samoa.
O Fomai e latou te tilivaina mataupu mo le B.A. in Theology ma o nei foi mataupu o le Tomatau (Curriculum) mai Amerika e faatino ai. O loo galulue foi le board ina ia faataunuuina vaega uma mo le lesitalaina o le aoga i totonu o le NZQA a Niu Sila. Ae ua mae‘a ona lesitalaina faavaomalo i lalo o le Accreditation Commission International i Amerika. O loo faipaaga foi le aoga ma le Intime Ministry International Bible University (ACI) i Amerika.
E ono lala ua faatuina ai le aoga: O Sini ma Brisbane i Ausetalia, o Aukilani, Kalaiesetete ma Ueligitone i Niu Sila, Hawaii faapea ma Tutuila. O loo alo atu i le masina o Fepuari e faatuina ai le isi lala i Apia ma le lala i Melepone i le tausaga fou.
Avea foi lenei avanoa e faamalo atu ai le Samoa Times ia i latou na tausinio mai tausaga e tele ma ua selesele foi i le manuia i lenei tausaga i faailoga taualoa mo le Tusi Paia. Faamanuia atu foi le Kerisimasi ma le Tausaga Fou i pule aoga ma faiaoga faapea lala uma o le AGAPE Bible College.
