Faamavae le F.A.G.A.S.A ma lo latou Faatamā
13/12/11 || Tusia: Leautuli Malaeta Sauvao ||
O le Komesina sili, Faatili Esera ma Sina Samani sui o le FAGASA i le faamavaega mo galuega o le tausaga faapea ma le faamavae atu i le faatama Asi Tuiataga Blakelock
Na auai le lala FAGASA a Ueligitone i le Aso Faraile 25 o Novema i le Working Men’s Club mo le latou faaiu tausaga ma faamavae aloaia atu ai i le Afioga a le Komesina Sili o Samoa; le Afioga i le Ao E‘e Asi Tuiataga James Blakelock, o lē sa fai ma faatamā o le FAGASA aoao i Niu Sila i tausaga e lima.
O lona fitu nei o tausaga talu ona galulue i le Laumua le afioga ia Asi Tuiataga Blakelock ma le faletua ia Helen i le tofi Komesina Sili mo si o tatou atunuu.
O le masina lenei o Tesema ua iai le faamoemoe o le a toe taliu ai i fanua le afioga i le Ao E‘e ma lana masiofo ona ua mae‘a tausaga sa tofia e galulue ai i le Laumua nei.
O se faatasiga na toafilemu, leai se pisapisao ona sa pulea uma sui o le lala a Ueligitone na auai ma lagona foi le alofa ona o mafutaga ma le faatamā ma le faletua o le a tetea nei.
Na toe to manatu ai foi i taimi ua alu e lē mafai ona gata le lagolago a le Komesina Sili i lenei foi vaega o tagata Samoa o loo taumafai pea ma le onosa’i i le tau faaolaolaina o le gagana Samoa i totonu o Niu Sila nei.
O fonotele uma a le FAGASA aoao i tausaga taitasi e lē mafai ona misi ai le afioga i le faatamā ma le faletua ona o lana auaunaga lagolago i soo se taumafaiga e ta‘u ai le suafa o Samoa.
E momoli atu ai foi alofaaga ma faamanuiaga mo lau Afioga i le Komesina Sili ma le faletua, le faatamā o le FAGASA e tusa o le toe sauni atu mo le faaauauina o le auaunaga mo si o tatou atunuu pele.
Ia saunia foi e le Atua ni isi avanoa e tatou te toe feiloai ai. Manuia le faigamalaga, le Kirisimasi ma le Tausaga Fou.
