Faaiu i Samoa fusuaga i le mae‘a o Niu Sila, Fiti ma Tahiti

Ua toe taliu i fanua le aufusu faapolofesa a Samoa ina ua mae‘a fusuaga i Fiti ma Tahiti i le faaiuga o le vaiaso sa auai, faapea ma le fusuaga i Niu Sila i le vaiaso atu i tua lea na manumalo ai Satiamaalii Vaitele Soi.

O lenei malaga taamilo o se vaega o tapenaga mo le amataina o le taamilosaga o fusuaga faavaomalo a le Pasefika i le tausaga fou, le Pacific International Boxing Championship (PIBC).

E lei faamanuiaina le fusuaga a Oli Filimaua ina ua faia‘ina i ‘ai i le mae‘a o taamilosaga e valu ia Junior Farzan Ali, le siamupini o Fiti i le aupaga ‘light welterweight’.

I le fusuaga i Tahiti, na lē manuia le taumafaiga a Tony Iapesa i le la taaloga ma Tinitua Neagle i le aupaga ‘welterweight’ faapea foi Michael Fonoti i le la taaloga ma Jean Louis Albertini ina ua faia‘ina uma i ‘ai. I le paga faapitoa, na taofia le fusuaga i le taamilosaga iva ina ua lē mafai ona faaauauina e Faimasasa Tavui le la fusuaga ma David Aloua o Niu Sila lea o loo koleniina e Anthony Mundine i Ausetalia.

O le Aso Tofi o le vaiaso nei i le fusuaga tele Samoa Pro Am Fights o le a talimalo ai Samoa i le aufusu e toatolu mai Fiti e faamae‘a i ai le tafafā o le taamilosaga a le Pasefika.

O paga faapitoa i le va o Samoa ma Fiti, o le a fetaui ai Pele Faumui o Fa‘ala Palauli ma Lalomalava i le aupaga o le ‘middleweight’ ma Abhay Chand o Fiti.

O Iosia Nanai o Falelatai ma Savaia i Lefaga i le aupaga ‘super middleweight’ o le a fetaui ma Meli Vutevute o Fiti, a o le aupaga ‘light heavyweight’ o le a fetaui ai Warren Fuiava o Fa‘ala Palauli ma Lalomalava ma Jovesa Vaileba o Fiti.

Faaalia e Pa‘u Fereti Puni o le pulega a le Event Polynesia, “E iai le talitonuga o le malolo ai o tama fusu faapolofesa a Samoa i Fiti ma Tahiti, o se lu‘i tau lea ia Pele, Iosia ma Warren.

O se tulaga ua atagia ai le maualuga o le tapenaga a Fiti ma Tahiti i le taamilosaga o le a amata ia Mati i Niu Sila i le tausaga fou.”

O le Aso Lua ma le Aso Lulu o le vaiaso nei o le a talimalo ai le kamupani fai fusuaga o le Event Polynesia i le fonotaga e faia i Apia i ‘promoters’ ua filifilia mo le tafafā o le PIBC, ma o le a faalauiloa aloaia ai nisi o fuafuaga alualu i luma o le taamilosaga.

O Tuilagi Saipele Esera o le sui lea o le Samoa Pro Am Fights i le fonotaga a ‘promoters’, lea o le a faatasi mai ai le alii promoter o Abdul Khan o le Wild West Promotions o Fiti, o le sui o le Polynesia Professional Boxing League o Tahiti o Reginald Leca, ma le sui o le Arcbridge Trust o Niu Sila ia Jenkins Tesese.

O nisi o mataupu tāua o lenei fonotaga e aofia ai le faamautuina o aiaiga o le taamilosaga, ae o le a faatuina ai foi ma se komiti e faafoeina le faatulagaina poo le ‘ranking’ o tama fusu i aupaga taitasi a le Pasefika.

Faaalia e Pa‘u, “O le faamoemoe o le PIBC o le a lē gata ina siitia ai le tulaga o tama fusu ma fusuaga a le Pasefika, ae o le a mafai ai e Samoa ma atunuu o le a talimalo i le PIBC ona maimoa i ni fusuaga lelei i le sailia o le siamupini o le Pasefika e aofia ai ma Niu Sila.