Ua lē faataunuuina e Pulega o Nuu i Porirua se fale mo tupulaga

Na pasia e le komiti a le Pulega o Nuu i Porirua i se fonotaga lata mai le leai o se tupe e fai ai se fale e suesue ai le tupulaga e pei ona sa faatulagaina mo galuega fuafua (plan) mai le 2009-2019.

Na faaalia e le alii ofisa le faaitiitia o le alualu i luma o le faia o lenei fale talu le maliu faafuasei o le alii fautua mo le atinaeina o galuega tau i tupulaga (Youth Development Adviser), le susuga i le tiakono ia Erika Erika. O le tau na fuafuaina e alu ai e $20,000.

O le susuga i le Pulenuu Nick Leggett na ia saunoa e iai le fale faapea o loo i le aai i Kapiti ae peitai e seāseā faaaogāina, ae tele tupe alu i le faamamā ma faafouina mea e faalelei ai.

O le faitau aofai o tamaiti e i lalo ifo o le 14 tausaga i le aai atoa o Porirua e tusa o le kuata o le aofai o tagata o Porirua e 52,700 mai le Ofisa o Faamaumauga. O se numera tele lea o tupulaga fai a‘e, ma e ao ona faia ni fale mo i latou e a‘oa‘o ai i le taimi e tuua ai aoga.

Saunoa le pulenuu e tele galuega ua faia mo tupulaga i tulaga tau malae taalo e pei o le malae i Waitangirua, Aquatic Centre o loo iai le fale aau ma paka eseese e taaalo ai.

Na fesiligia tupulaga i le a‘oga a Rangikura mo se latou iloa i galuega ia ua faia e taaalo ai, ma na faaalia le fiafia o tamaiti i le tele o malae taalo, ae peitai e iai le tele o malae taalo e ao ona toe faaleleia tulaga uma mo le matagofie ma le fiafia i ai o tamaiti e faaaogā.

Na faaalia le faanoanoa o le faipule pito i talavou o le Pulega a Nuu o Bronwyn Kropp, 20 tausaga, fai mai e tele galuega ua faia mo tamaiti laiti, ae tatau ona faaleleia tulaga o galuega mo le tupulaga lea e 12-18 tausaga le matutua. Talu ai ona sa toesea le faipule lea i le fono a le komiti lea na pasia ai lea mataupu, o lea o le a sauni ai ma Wayne Poutoa o se faipule Samoa e i le Pulega Nuu, e toe faaalia lo la tetee i le faaiuga ua fai pe a fai le fono i le aso 16 o Novema