Pisi le laumua i faasalalauga o le palota ia Novema
15/11/11 || Tusia: Leautuli Malaeta Sauvao ||
O loo logologoā pea tala faasalalau mai le TV, leitio faapea nusipepa e uiga i le tapenaina o tagata mo le faiga palota o loo lumanai nei mo se faigamalo fou.
E tele ituaiga faiga palota ia ua tuu mai e filifili ai tagata e iai le MMP (Mixed Member of Parliament, FPP (First Past the Post) ma le STV (Single Transferrable Vote).
Sa tuumumusu mai se tasi o le aufaitau i lenei lomiga, pe aisea ua saga faasalalau mai ai e o tagata e vaai le Upega o Fesootaiga o loo iai faamaninoga, ae matuā lē iloa e le toatele o le aumatutua ona faaaogā le komepiuta.
O le itu e ao ona fai o le o mai o tagata o le ofisa faipalota e faamalamalama lelei le faiga o nei mau mataitusi faatasi ai ma le faiga o le palota atoa.
Na tali i le uo lea, e sili le fesili i se isi o le Ofisa faipalota e ta‘u tonu mai lava le tuatusi i luga o le leitio e maua i ai se tusi faasamoa e faitau ai, auā e faalogo e iai tusi ua uma ona faaliliuina i gagana a atumotu eseese. O le ala foi lea o le toatele o tagata Pasefika e lē palota ona o le lē malamalama le isi mafuaaga, aemaise ai lava ma le faapalapala ina a tele.
Ia mautinoa lelei, e maua le fesoasoani mo tagata Pasefika pe afai e toatele e palota, e iloa ai fuafua e le malo tala faatatau o tupe mo ia fesoasoani. E lē aogā le mu loa le lima tapa i le i‘ofi, ma tuua‘ia faigamalo, ae leai se galuega na faatinoina mo faiga palota.
E fautua atu ai foi le Sooatulau mo le aufaitau i Aotearoa nei ina ia tatou mataala e lesitala uma i le palota, ma ia faataunuu lau palota i le aso ua faamoemoeina.
