Fiafia tamaiti aoga tulagalua i faafiafiaga faaleaganuu
15/11/11 || Tusia: Leautuli Malaeta Sauvao ||
Na faatumulia le hall a Hosanna Fellowship i Cannons Creek i le aumaimoa a o faafiafia le a‘oga a Postgate i Whitby i Porirua, Ueligitone i le faatinoina o sāsā faasamoa, haka faamaori, siva laau ma siva poi faamaori, faapea pesega a aufaipese, o le fa‘aili ma le polyfunk ma siva mai isi atunuu eseese, na faaalia ai le fiafia tele o le fanau e faamaimoa i ai o latou mātua ma uo.
Na saunoa lo latou faiaoga a‘o siva o Te Rehia Mathews o le avanoa lenei e faaalia ai galuega a le fanau sa faia i le tausaga i mataupu a‘oa‘oina, aemaise le faatāuaina o aganuu eseese e o mai ai le toatele o tamaiti.
Na faaalia foi le fiafia o mātua i tamaiti na latou pepese mai i le aufaipese ma le iloa o le taina o kitara, iliina o pu ma ta tagipalau i le fa‘aili mo le mataupu o le musika. Faitauina o tala tusitusia ma tauloto i le tusitusi atoa ma le faaaliga o galuega e tele na faia i tusiga ata ma valiga ata a le fanau.
Faamalo atu ia Postgate mo le faaaliga o ia taleni ua mafai ai foi ona vaaia le galulue faatasi o soo se tamaitiiti mai soo se atunuu ia latou aganuu.
