Alo atu Ekalesia Tokelau mo le 150 tausaga o le lotu

O le vaiaso na tea nei ma le vaiaso nei o loo ua gasolo ai le mamalu o ekalesia o o tatou uso Tokelau mo le faamanatuina o le 150 tausaga talu ona taunuu atu le Talalelei i le motu.

E toatele faifeau ma o tatou uso Samoa e mau paolo atu i tagatanuu Tokelau o loo sauni atu mo lea faamoemoe e malaga atu i Samoa ma folau atu ai mo le Atu Tokelau i le vaiaso nei.

O le aso 14 o Novema e faamoemoe e faataunuu ai lea faamoemoe i le motu o Atafu ma faapea foi ona toe malaga atu mo le motu i Fakaofo e faataunuu ai le isi sauniga ma faatino ai le fono faaletausaga a le Ekalesia Faapotopotoga Kerisiano Tokelau.

E tolu ekalesia mai le laumua o loo faimalaga atu i lea faamoemoe; o Papalaulelei, Pahina ma le Itupa Tokelau mai le ekalesia PIPC i Porirua. E faapena foi le tele o ekalesia mai Amerika, Hawaii, Ausetalia ma Niu Sila nei faapea ma Nukunonu, o le a faatasia uma i le faailogaina o le 150 tausaga i Atafu.

Avea foi lenei lomiga e fai ma avanoa e momoli atu ai faamanuiaga a le Samoa Times i le Afioga i le Taitaifono Aoao, le susuga i le Toeaina ia Tui Sopoaga, le aufaigaluega paia a le Atua ma ekalesia Tokelau uma mo le alo atu i lea sauniga tāua.

O le a faaauau atu se tala i le isi lomiga e uiga i lea sauniga. Ia manuia tele le faigamalaga i luga o le fogaeleele, ‘ea ma le vasa!