Tuumalo le faafeagaiga Rev. Lapana Niuapapa Faletolu

Talofa ua solo le falute, ua tafea pulu i vai, aua ua e le toliniu i le fuiniu, a ua e toliniu i le fuisa’a.
E ui lava ua ufi faō le utu, pe nuti le kate ma motu le maea sa tuulima ai le fofoga taumafa ole feau faa-le-tala lelei, a’o le upu moni, ua tuu i le vaieli ole lalolagi lana ipu ‘afei, ae alu e momoli i lona Alii, lana fatua’i upu sa tali ai lana valaau.
O le tuumalo o le susuga i le faafeagaiga taulagi, Rev Lapana Niuapapa Faletolu, 60 tausaga o lona soifua i le aso 6.10.2011, ma faamanaina e lona matai ana galuega ao fa’ataotolia i lona gasegase i totonu o le falemai tele i Kalaiesetete.
Ua tu’ufua maota ole tala lelei sa tāui ai mea-sina, ae maise lana ekalesia pele St Pauls Trinity Pacific Presbyterian Church ma o le fa’ia o se poutu o se maota e faalogoina le gatete o le fale atoa.
Ua lagia vaiauau o le maota e afio ai Satuala o le aiga faalagilagi, afio ai Aiono ma Leaupepe, susu mai Su’a ma Toleafoa ma le Ta’auso, maliu mai le matua oTauauve’a ma le mamalu i le Falefitu.
Ae tainane foi le gau o le sa’a i le afio o le Alo Sina, le paia i le Faletolu ma le Vai na lelepa, ae tainane upu ia te oe Tuisamau, afio alo o Malietoa ma le paia i le aiga Salevalasi.
Na soifua mai Lapana Faletolu i le aso 1 Iuni 1951 i lona afioaga o Fasitoo, e lona sefululua o ia i le faasologa o le fanau e 13 faatasi ai ma ona uso ma tuafafine faaletulafono e to’alima, ma o se auaiga e tupu ma lauolaola e oo mai i le aso. Ua tuua nei le mafutaga ma le faletua ia Salote Faletolu faapea o la alo tamaitai e to’afa ma grandchildren ina ua tōai faa-i’a ole pō le valaau paia a le Atua.
O le afiafi o le aso sa, 9 Oketopa i le ma’ea ai o sauniga o le lotu a le fanau na molimoli mai ai lona tino maliu i le hall o lana Ekalesia St Paul’s sei lolotu faatasi ma lana aulotu ma o se sauniga faatumulia.
O le aso 11.10.2011 na faia ai lona sauniga faa le aiga i le St Pauls Trinity Pacific Church, taitaia e Rev Robin Walsh ma Rev Samoa Mavaega, matagofie le teuteuina o le hall i tulaga uma i laei o le malumalu, talu ai o le latou falesa lea na faaleagaina i le mafui’e. Na faatumulia le sauniga i le paia o le aufaigaluega a le Atua ae maise le mafutaga a faifeau i totonu o Kalaiesetete, o le mamalu o le atunuu le mafaitaulia, o uso a palagi ae maise le aiga faanoanoa malaga mai Ausetalia, Amerika ma Samoa.
O le fofoga o le ekalesia, tofa Laufiso Solimalo na faatautaia le polokalame i le faagasolo atu o le valevale alofa o uso a ekalesia, uo ma e masani e ala i teu fugalaau ma ie laise masani ai aso faapenei. O le susuga i le toeaina Rev Tumama Vili na tuvaoina molimau o le lotu faaleaiga, na ia saunoa ai e tala lasi ma tala leo malie le mafutaga ma Lapana Faletolu, ua afu lana tautua i le nuu ma le ekalesia, e matautia lona alofa ae o se faifeau ese le leo lelei.
E sautualasi molimau matagofie o lea afiafi, faapea se lagona mafatia o le tuafafine o Pua Faletolu mai Ueligitone, o Lapana o le lupe faalele e tiu ai le aiga, saunoa le tama matua o le aulotu afioga Amituanai, tatalo pea i le Atua ia toe maua se latou tofi fou e tutusa lelei ma Lapana.

Nisi o auaunaga le faatuaoia a Rev Lapana Faletolu:
• Saunoa le failautusi aoao St Pauls Trinity Pacific, le susuga Ataga’i Esera, ua 21 tausaga talu ona galue Lapana Faletolu i totonu o le ekalesia St Paul’s, ina ua ma’ea lana tautua i le aulotu i Amberley. Tele tiute ma galuega eseese fa’agalo gata na ia atia’e, ae maise o ana malaga i atunuu mamao pei o Siamani, Oxford University, Cook Is ma Toga. Na ia auai faatasi ma le faigamalaga a le tamaitai Palemia o NiuSila Hon. Helen Clarke i Samoa i le faamanatuina o le 40 tausaga o le malo Tutoatasi, ma o lana malaga mulimuli nei ia Me 2011 i le laufanua o le Ekalesia Aoao EFKS i Malua, e molimoli lana faafetai ae maise le ekalesia e tusa ma le agalelei i le foai tupe mo St Paul’s ona o mafatiaga o le mafui’e. O loo mataina foi ana galuega i totonu o le community, ae maise pulega o le City Council pei ona fesootai vavalalata ai ma le afioga i le pulenuu, Bob Parker faapea matagaluega o le malo, fanau tupulaga a le Pasefika, ma le sosaiete alo Samoa Iunivesite o Canterbury.
• O le failautusi o le itupa Samoa, fetalaiga Laufiso Solimalo na faaopoopo i le latou mafutaga i tausaga e tele, o ia foi sa fai ma fofoga o le aso i le peau faamavae o le susuga i le faifeau, lea na alo faiva iai le mamalu o le ekalesia.
• O le tofa Tauauve’a Peseta Molilaauifoga’a Faletolu, na fai ma sui ole aiga, na ia faapea ane “ E ua maliliu toa, ua maimau a’upega o le taua”, o se tagata osiosi aiga lelei ae tumu i le loto maulalo ma ona uiga fiafia i taimi uma.
• Na faasolo ane molimau a le faletua o Salote ma o la alo tamaitai, Annie, Epenesa, Sela ma le uii o Gaseilevao Faletolu, ua laugatasia uma i le latou molimau, o se tama faafiafia loto, le sa saili iai le mau e lana fanau, lona aiga ma lana Ekalesia, ae ui lava ina tatou moomoo e taofiofi Lapana aua le mau sa ia te ia, ae sili le silafia o lo tatou Alii le Manuia ua folafolaina mo e ua manumalo.

O le aso 13.10.2011 na faataunuuina ai ona toe sauniga, ao lei momoli maia lona sa i totonu o le malumalu, sa muai faia le haka mataina ma le lagona ootia e alo tupulaga o le ekalesia i fafo atu o laufanua o le lotu. O tiakono e toavalu o le aulotu na momoli maia lona sa ma faaulufale mai e susuga i alii faifeau Rev Robin Walsh ma Rev Samoa Mavaega.
E lei iai se vaipanoa o le falesa na avanoa, nisi na faafofoga mai fafo ona o le tumu tele, na auai le paia eseese o le aufaigaluega a le Atua mai soo se fata faitaulaga i Kalaiesetete, le mafutaga a faifeau, o le aufaigaluega mai Aukilani seia paia le motu i sauté, sui o le malo o Samoa, le afioga Komesina Asi Blakelock ma lona faletua, afioga pulenuu Kalaiesetete Hon Bob Parker ma lona faletua, sui o le Palemene mai itumalo eseese o Kalaiesetete, ae maise le maave lasilasi o le atunuu, uso a palagi, uo ma le aiga faanoanoa. Na faapea ona faaiu ona toe sauniga i lona oliolisaga i le fanua maliu i Memorial Park Cemetery, lea sa taitaia e susuga i alii faifeau Rev Robin Walsh, Rev Samoa Mavaega ma Rev Bruce Hansen.
Na toe taliu atu le mamalu o le valaaulia ma le aofia i le hall, ma le faleie tele maea teuteuina ma faatulagaina mo le taumafataga aua le peau faamavae lea na tapena faafafine toaga e le mamalu o le ekalesia, ma o le failautusi aoao, susuga Atagai Esera sa saunoa mo uso papalagi, ae o le fetalaiga Laufiso Solimalo sa lauama tootoo i le aso. Na faatofusia le mamalu o le aufaigaluega a le Atua, ae maise malo na auai i meaalofa teutusi o faaaloaloga maualuluga ma pelega o le faifeau. Ua titi manu ua lava manu, ua fata luga ua fata lalo i le teu ma le faaaloalo, ua malie le papa i Galagala ua malie foi le Faga i Paau i le teu faatamalii. O le fetalaiga Molioo Ene Molioo (EFKS Woolston) na tali fuaitau e fai ma sui o le valaaulia ae maise Samoa ua potopoto e tusa ma le faaaloalo na ma’ama’au iai le mamalu o le ekalesia. “Amuia e ua oti,o e oti oi le Alii.
Ua malolo ia latou galuega tiga, o a latou galuega foi e mulimuli ia tei latou”.
Na tatala le filialii ina ua taape fiafia le aofia ae alo atu le mamalu o le aiga faanoanoa i le tofa Tauauve‘a Peseta Molilaauifogaa Faletolu & afioga Nanai Funa Tuiletufuga mo le latou fesaga’iga aua le paia i le ekalesia St Pauls Trinity Pacific Church e tusa ai ma le faamoemoe ua faaiuina i le manuia.