Tauaaoina e Faleatiu ma Vailuutai le $45,218.00 i la latou Tausala

O le Aso Toonai na tea nei na faatumulia ai le maota o le PIPC i Porirua i le mamalu o le auvalaaulia faapea le susū ai o le aufaigaluega paia a le Atua ma o latou faletua, aemaise uo ma ē masani faapea paolo ma gafa o le mafutaga o le falelua; o le paia lava lea i le afio o Letelemaaana o le alo o  Tamaalelagi, afio Leifoivao o le Matua o le Tuiaana ma le Taufia, alalatai le fetalaiga a Talimatasi ma le mamalu o le Faleaana. E faapena foi le paia i le Aiga Taulagi, le Maupu o Tuiaana ma le mamalu i le Falefitu.

O le faamoemoe sa faaautu i ai le Tausala o se seleni mo le faamae‘aina o le aitalafu o le Mauga o le Atua i le ekalesia Metotisi lea e i le afioaga i Faleatiu ma na faaulufale i le tausaga ua tuanai. 

O le polokalame o le aso na amataina i le lotu faafetai na taitaia e le susuga i le Taitaifono Aoao(Moderator) o le Matagaluega Perepereane i Ueligitone, le susuga ia Rev Perema Leasi, a o le Faafeagaiga taulagi foi a le ekalesia PIPC i Porirua. Sosoo ai loa ma le faasologa o ipu a matafale taitasi ma le toatele o le atunuu i soo se ekalesia na alolofa ane i le faamoemoe. 

O se aso matagofie i le sasaa faapā sina o sā‘aga le alofa ma le tautua lotu o tagata e pei o na sa faaalia i le foai o le taulaga ma le agaga fiafia. 

O nai isi aiga e ui ina soifua i le penefiti, toe taitoatasi le tagata faigaluega ae na matua vaaia le filiga e lafo ma le agaga fiafia, aua le Mauga o le Atua. O le agaga tautua lotu lea o o tatou tagata Samoa e le mafai ona vaaia o faatino e  isi atunuu. O le ala foi lea e tulaga ese ai lava Samoa i a latou aganuu faale tautua lotu ma le soifua auauna i le finagalo o le Atua.

Na matuā susū mai lava le Susuga i le Sea o le Sinoti Rev Savaii Loto ma susuga i faifeau Metotisi uma o le faasinoti i Ueligitone e lagolago le faamoemoe. Malo le tautua i le Talalelei.

O le fetalaiga ia Lio Fanaea Paese na fai ma fofoga o le aso, a o le afioga i le Matua o le Tuiaana ia Feiloivao Leaupepe Talo na malele e fai ma fofoga o le Falelua ma le susuga i le faafeagaiga ma le aulotu e momoli le faafetai ma le faamalo i le paia o le aufaigaluega a le Atua ma le mamalu o le auvalaaulia e tusa o le taulaga ua foai mo le Mauga o Ieova.

O le susuga i le Failautusi o le Sinoti a Ueligitone le susuga ia Rev. Tulasi Unasa Ioane na saunoaina le tatalo e faapaia ai le taulaga na maua mo le faamoemoe, a o le failautusi a le Itupa Samoa o le ekalesia PIC i Porirua na fai ma fofoga o le Aufaigaluega i le vasega o faafeagaiga, aemaise le auvalaaulia e faafetaia le Falelua ia Faletiu ma Vailuutai, i le taumafataga felanulanuai matagofie na gasea ai i le tapenaga auā lo latou faamoemoe.

O le tala fiafia na maua i lea aso; ua mae‘a ai le aitalafu o le Peteli o le Atua i le tupe lea o le Tausala. Ae iai le talitonuga e toe faaopoopoina le seleni lea ona e lei mae‘a atu isi tusi valaau ma isi matafale na le avanoa atu e lafo a latou taulaga.

E faamalo atu ai le sui o le Samoa Times i nei foi afioaga i le susue pea o faamalama ma tepa atu i le nuu moni o loo alaga mai pea: “Sau ia i Maketonia nei ma fesoasoani mai ia te i matou”