Silia ma le selau afe tagata faatalia le Olopeleki i le laumua

O le itula e 12 i le aoauli o le Aso Lua na tea nei, na matauina ai se vaaiga faagalogata, le lalolagi o tagata na latou faatali i soo se magaala o le taulaga ma le agaga faagaeetia le taunuu mai o le siamupini o le lalolagi, le Olopeleki i le laumua, ona o se aso na amata o lagi lelei ae faaiu i le malosi o le savili ma le maligi o timuga. Ai o sāsā o le manumalo. 

E ui lava ina malulu, ae lei faavaivai le lautele o tagata na latou faaalia lo latou agaga fiafia i tama taaalo, a o taamilo faasolosolo mālie mai a latou taavale i le taulaga i Ueligitione .

Ina ua taunuu i le malae o le Palemene, na saunoa le susuga i le Palemia o Niu Sila Hon John Key e faafetaia aloaia le ‘aulakapi ma le ‘aumalaga, ae na faapea foi ona faafiafiaina le anoano o le tagata i luma o le fale o le Palemene ina ua alo tama o le Olopeleki i le haka faaiu mo le samiga o le latou manumalo. Sa taufai pati ma feei ai le aofia na potopoto ina ua maimoaina le Haka mulimuli a nai tama o le taamilosaga i luma o maota o le malo o Niu Sila.

Sa toatele foi o tatou tagata Samoa ma a latou fu‘a o le Manu Samoa sa faalealea ai, e ui lava e lē o manumalo le Manu, ae na vaaia lava tagata ma a latou fu‘a Samoa i lea tumutumu. E faaalia ai foi le fiafia o tatou tagata i la tatou lava ‘au.

Faafetai le taalo, mālō le finau Maa Nonu, Malili Muliaina, Kevan Mealamu, Sonny Bill Williams, Jerome Kaino,Victor Vito, IsaiaToiava. Faamanuia atu le Atua!

E ui lava ina fai mai ni isi e na o le tasi le ‘ai o le tau o le manumalo, ae a tagai i le ata lapoa (bigger picture) ma ‘ai o taaloga a nai tama i le taamilosaga atoa, o se matuā manaia lava o le taaalo faafiafia loto i le autapuai ma le lalolagi atoa. Toe alo mo le 2015 pe faasima iinei le Ipu