Manumalo le Kolisi o Aotea i tauvaga musika faavaomalo, a le International Rising Star i Amerika

O le lua ma le afa vaiaso ua tuanai na malaga atu ai le aufaipese a tamaitai Samoa e toafā (quartet) mai le Kolisi o Aotea i le Iunaite Setete o Amerika mo le tauvaga mulimuli faavaomalo lea sa faataunuuina ai.

O le faalua lea ona auai le toafā lea i lea tauvaga i Amerika ma o le tauvaga mulimuli lea ma ua manumalo ai. Viia lava le Alii ona ua pa‘ū atu le Manu Samoa ae tulai mai nei alo o Samoa ma lenei tala fiafia, ua faamalieina ai le tapuaiga.

E toafā tamaitai o le vasega 7 tausaga 13: Theodora Esera, Knoxana Leasi, Georgina Peniamina e ta‘i 17 tausaga i latou ia e toatolu, ma o Samoa uma, faapea Olivia Samuel 18 tausaga, o le afa Samoa afa Kuki Airani. 

O faailoga o le manumalo; e tofu i latou ma le pine auro, teufugalaau matagofie ma le $2000 US mo le vaega atoa. O le latou faiaoga i le musika o Marilyn Paigent faapea le susuga a David Brooks o le latou quartet coach lena na latou malaga faatasi i Amerika mo le tauvaga.

E 17 aufaipese mai Amerika, Kanata ma isi atunuu na auai, ae filo ai na o le tasi le aufaipese(quartet) mai Niu Sila, ae o lea ua sola mai ma le manumalo. E lē  na o aoga e iai, ae aofia ai aufaipese mai soo se vaega taitoafā lava ua lautogia mo le tauvaga mulimuli (final) na aofia ai.

Na maua le avanoa e fesootai atu ai le sui o le Samoa Times i le susuga ia Merilyn Paigent ma le tamaitai o Knoxana, ma na ia faamatala le matagofie o lea vaega o le lalolagi. Fai mai a ia e ese le telē anoanoai o le vaai i Amerika pe a faatusa atu ia Niu Sila. O le tulaga i le tau, fai mai e 30 tikeri le vevela o loo ua iai Amerika i le taimi nei, ma na latou faalogoina le mālū o le ea malulu ina ua taunuu mai i Aotearoa nei. O lo latou tausaga faaiu lenei i le aoga ma na saunoa Marilyn e maua le taimi e toe talanoaina ai le tulaga e oo iai le aufaipese lea mo le lumanai pe afai e mae‘a suega o le tausaga nei. O loo iai le faamoemoe e toe faaauau pea lenei taleni. Ta‘ua e Knoxana o seleni mai ia latou sailiga tupe sa fai faapea ma le fesoasoani mai a Funding Trusts sa talosaga i ai a latou faiaoga o le musika, na mafai ai ona faatupe lo latou faamoemoe i pasese ma faletalimalo mo le tauvaga mulimuli. 

Na ia manatu foi e momoli atu le faafetai ma le faamalo tele i o latou mātua, a latou ekalesia ma le aoga i le tapuaiga sa faia mo i latou, a o toesea ai i Amerika. Avea ai foi lenei lomiga ma avanoa e faamalo ma faafetai atu ai la tatou nusipepa i nei alo o Samoa i le sogasoga i lenei foi matata o le musika. Ia saga faamumūina pea le lamepa o musika ia te outou ma faasusulu atu ai i ē o i fale uma. Faafetai le saili malo. Ia manuia tele lo outou alo atu i suega faaiu o le tausagai.