Faatāua le mataupu i Sauāga
7/11/11 || Tusia: Ivona Laufili Tuaimau ||
Mamalu lasilasi o le atunuu na talisapaia le polokalame Samoan Families Domestic Violence Awareness
Sarah Tau Tuvale, Alice Wheatley, Ruta Tomupaipe‘a ma Charissa Suli
Afioga Sala Susan Piliae Doneski ma lana ausiva, na saunia siva faapasefika, ma Margaret, Pule Amituanai, ma Evana Lilomaiava…au pepese.
O se tasi lenei o mataupu ua sili ona faatāua i polokalame a le Anglicare i Mt Druitt, lea o loo tu‘i ai le muli papaga e faletua Samoa o Ruta Tonumaipea ma Sarah Tau Tuvale.
O Ruta ua loa tausaga o galue mo le faaleleia atili o aiga ma fanau, lea foi sa tautua ai i le Fono Faufautua. Ae ua faamanuiaina i laua ma le tamā o le aiga i se avanoa e faigaluega ai i Papua New Guinea mo le tolu tausaga, mo le Ekalesia a Iesu Keriso o le Au Paia o Aso e Gata Ai. Ua sui tulaga nei le tamaitai o Sarah, e lei leva ona faaiu i mataupu o sauāga i totonu o aiga, ma lotoifale.
O le afiafi o le Aso Lulu, na lofia ai le hall i Tregear, i le tele o mātua ma o latou alo, na molimauina ma lagolagoina le faatalauula mai a nei tina Samoa.
Na amata le polokalame i le faafeiloaiga o le mamalu lasilasi o le atunuu e le tamaitai Pule o le Anglicare, o Alice Wheatley. Sosoo ai ma se sauniga lotu puupuu, aemaise ni upu faalaeiau, mai le susuga a le faafeagaiga, o Rev Uilikilifi Vaifale a le EFKS i Plumpton.
Saunoa Ruta, i le autu o le polokalame ina ia faatāua le talanoaina o lenei mataupu, o le Sauaina, talu ai se ripoti a le Matagaluega a Leoleo Niu Sa Uelese, mai le 01/01/2008 – 23/06/2008. I faamaumauga i le aai lava o Mt Druitt, e 3,135 i latou mai atumotu a le Pasefika na faamaonia le solitulafono. I le vaitaimi puupuu lenei a faatusa atu, ua 21% o tatou tagata ua amio lē pulea. Ua maualuga tele lenei fuainumera, pe a fuafua i isi atunuu o loo aumau i Mt Druitt.
Ua faateteleina o tatou tagata, aemaise fanau talavou, ua tofu atu i le falepuipui, ona ua a tele fanau ua auai i kegi, e pei o le Blood Never Surrender, The Cribbs, Niggers from the Pacific ma le Full Blooded Islanders.
O le ala lea o le faatāua o nei polokalame, auā le puipui o aiga ma fanau, mai sauāga i totonu lava o lotoifale.
Sa auiliili uma e Ruta vaega eseese e aofia i le faaupuga lenei o le sauāina poo le abuse, e lē gata ina afaina ai le tino, aemaise foi i le mafaufau ma faalogona. Sa ia faamamafa foi le tatau i mātua ona aua ne‘i sauāina fanau.
Sa iai se DVD na maimoaina i lea afiafi, ua faaigoaina o le Safe Tongan Families, sa faatāua ai le toafilemu ma le saogalemu i totonu o aiga. Tele isi sui na saunoa foi e talatala nisi o vaega o loo aofia i lalo o le latou polokalame fesoasoani, e pei o le sao o le Pacific Islands Liaison Officer, Chifley College, Bidwill Campus, le Susuga Mekiafa Oli, le tamaitai o Iokapeta Vaoga, o loo galue i le Noumea Public School, sa saunoa i le faafaileleina o tamaiti.
O le sao mulimuli mo le polokalame, na fofogaina ma saunia e se alo o Samoa, ua tulaga maualuga i totonu o le Corrective Services.
O Peresetene Mark Peteru, Senior Assistant Superintendent, John Moroney Correction Centre, na talanoaina le tele naua o tagata Pasefika i falepuipui.
O loo tele matagaluega ma faalapotopotoga e pei o le Anglicare e mafai ona fesoasoani i lou aiga, ina ia faaitiitia le sauaina poo sauaga.
Na faaiuina le polokalame i se tatalo, na toe saunia e Rev Uikilifi Vaifale, ao lei alo atu i taumafa mamafa na maau i ai le Anglicare ma faletua ia Ruta Tonumaipea ma Sarah Tau Tuvale.
