Faamanatu le 25 tausaga o Whitireia Polytechnic
7/11/11 || Tusia: Leautuli Malaeta Sauvao ||
O se vaaiga mataina le faatumulia o le Politekinika a Whitireia i le aoauli o le Aso Toonai ua tuanai i le faamanatuina o le latou Aso Fanau le 25 tausaga. O le tele o le aufaafiafia mai vaega eseese o le vaiaai i Porirua e pei o faaili, siva ma aufaipese eseese na latou faafiafia i le aso tele o le aoga.
Na toe faafofogaina ai foi siufofoga mālie o le aufaipese toafā (quartet) a tamaitai mai le Kolisi o Aotea lea na manumalo mai le tauvaga faavaomalo i Amerika. Na faapena foi ona faafiafia ai le ‘ausiva mai le aoga a Rangikura lea o loo sauni atu e tauva i le tauvaga aoao e faia i Aukilani i le Aso Toonai 11 o Novema.
O taaloga eseese ma faleaiga o taumafa felanulanuai faapea ma faleoloa laiti o mea taulima eseese na faamalieina ai le galala ma le faatau a tagata o le vaiaai ma isi mai fafo atu o le laumua na latou auai i le faamanatuina o le Aso Fanau o Whitireia.
Na matagofie foi le tele o saunoaga aami mo le faamoemoe aemaise o le saunoaga i le alii pule o le aoga le susuga ia Don Campbell i le tele o le suiga fou ua iai nei Whitireia. Ua lē gata i le tele o le faaopoopo pea o fale mo vasega ma matata eseese, ae o le faaopoopoina pea o aoaoga eseese o loo mafai ona aotau ai tagata mo le sailiga o le atamai faaleaoaoga ma le tapenaina o i latou e fia sue ni galuega.
O le tausaga lenei o loo taumafai ai le faapāaga ma le Well Tec mai Lower Hutt ma o loo faagaioi pea lea faamoemoe seia mae‘a le fesootai atu i tagata lautele mo ni o latou finagalo.
O lenei faamoemoe o le’a mafai ai ona maua avanoa o le tele o i latou e fia aotauina mo ituaiga galuega e finagalo ai i totonu o Porirua, nai lo le malaga mamao i Lower Hutt. Tatou talosia lea suiga pe lelei mo tatou uma.
Ia manuia lou 25 tausaga Whitireia!
