Valoia mea lelei i le lakapi mafua i faaletonu
24/10/11 || Tusia: Autagavaia Tipi Autagavaia || 2 responses
Le faiaoga o le Manu Samoa, Fuimaono Titimaea Tafua, ma le taitaimalaga, Tuala Mathew Vaea
E lē o toe po le silafia a le atunuu i faaletonu na fetaiai ma le aulakapi a le Manu Samoa a o faagasolo le Ipu o le lalolagi i lona amataga.
O faaletonu na taualuga ai taaloga a le aulakapi a le atunuu i se tulaga e lei manuia lona faamoemoe i le fia saofai i totonu o quarterfinals ina ua malolo ia Aferika i Saute.
O ia foi faaletonu na saga mapuna a‘e ina ua mimilo lagona o le atunuu ma le tapuaiga a Samoa ina ua maua tala o le a lē foi i fanua le ‘au se‘i fai se fesagaiga ma le atunuu, ma ave i ai le faafetai ona e ui ina lē tau lau o le faamoemoe, ae na matuā faamalieina le tapuaiga i le tulaga maualuga na iai le taumafai o lana aulakapi.
“O le mea pito sili lena ona faanoanoa ai tama o le ‘au ona na lē oo loa i quarterfinals, fai mai loa e ta‘ape ma toe foi i konekarate”. O le manatu lea o se tasi o tusitala o taaloga mai Samoa sa malaga faatasi ma le Manu Samoa i le Ipu o le lalolagi, le susuga Sioeli Alofaifo Taulealeausumai, ina ua fesiligia mo sana faamatalaga.
“E oo i lo tatou atunuu i Niu Sila sa matuā lagona le lē fiafia ina ua maua tala o le a ta‘ape le ‘au e aunoa ma se fuafuaga e foi i Samoa se‘i feiloai ma le atunuu”. O le mau a le alii tusitala o taaloga a le leitio Polenisia, o lana faaiuga e tusa ai ma le tulaga na aliali mai ua tatau ona suia atoa le pulega o galuega a le Iuni lakapi poo le Administration.
“O le tausaga e 2004 na amata ai ona lotolotoi i le lipotia o soo se taumafaiga a le tatou aulakapi, ma o le mea lava lea sa ou matauina o le lē lelei ona pulea gaioiga ma tonufai a le iuni e faasino i le tatou Manu Samoa…. Na matimati nei le faatalauula a le iuni i le atunuu mo le fia maua o se fesoasoani tupe auā tapenaga o le ‘au, ae na uma loa ua lē au i luga, tauaso loa le silasila i le tapuaiga a Samoa”.
E ui i mataupu sa vesia ai le lotoifale o le pulega o le Manu Samoa ona o lagona faaalia o se tasi o tama o le ‘au le alii o Eliota Fuimaono Sapolu, peitai sa lilifa le lagona lagolagoina e tagata o manatu faaalia o lea tama taalo, ona o se avanoa ua tuusa‘o atu ai i fofoga o le pulega o le lakapi a le lalolagi le IRB, ni lagona lē fiafia o le tapuaiga.
Ae e ui ina vesia lea mataupu ae o le faato‘ā foi mai o nisi o le tama o le aulakapi ae ua vaiaso talu ona mae‘a le taaloga mulimuli na malolo ai i Pool Games, na sili ona ilitatai ai lagona o le tapuaiga.
E lei maua se avanoa i le taitaimalaga le afioga Tuala Mathew Vaea mo sona finagalo, peitai o luga o le leitio o le 2AP na faaalia ai e le taitaifono o le iuni le afioga i le Palemia, Tuilaepa Lupesoliai Sailele Malielegaoi, sa feiloai ma le pulega o le ‘au ma o le tasi lea o mataupu sa ia fesiligia. O le tala atu a le pulega sa iai le fuafuaga e toe foi mai peitai o nisi o le ‘au e tatau ona foi ia latou konekarate.
O le kapeteni o le Manu Samoa le alii o Mahonri Schwalger, sa ia faaleo le lagona lē fiafia o tama o le aulakapi i le leai o se faamatalaga i le foi mai i Samoa, e ui sa ia faaalia o le tala atu a le taitaimalaga a o loma le taaloga ma Aferika i Saute, e foi i Samoa pe a au i quarterfinals, ae a leai, ua toe foi ia latou konekarate.
O le finagalo o le taitaifono i luga o le leitio a le Malo, na ia faaalia ai o mea ua tutupu ma aliali mai i le Ipu o le lalolagi i Niu Sila, o le a tele ni mea lelei o le a fanau mai ai i le lumanai aemaise le isi Ipu o le lalolagi.
Faanoanoa tele pea faitau atu i lea tala..Fai mai fo’i o le Uta ma le Tofa,Ao lea ua ta’u mai lava le gaogao i’i o ia faaiuga ua fai i Tama taa’alo.O le mea tonu lava lea e ta’u o le Iloa Malo ae le Iloa Faiaiga.Talofa i le tapuaiga a le Atunuu ma kakou tagata o loo aumau i NZ,mimita i lo tou faaeaea o si tatou au pea matamata atu Malo lava le loto Atunuu…Ia o lea e maikau aku ai fou ua uma kupe ga ai e kama kekele ae makua oki lava gai kama ga kigaiga…..
Ua ou faitau atu i le website a le isi nusipepa, ua to’a 8 tama lakapi sinia a le Manu Samoa ua latou lagolagoina le lipoti a le susuga i le kapeteni. Talitonu o se mataupu ma’ale’ale tele, ona pe a fua atu i le tulaga sa oo i ai le taumafai a le tatou a’u ma le talitonuga e o’o atu i le Quater Final. Afai ae faamaonia nei tuuaiga, Talofa i le tapuaiga a le atunuu, leitioa a faaletonu le taumafaiga a nai tama. O a’u sa ou peti e oo le tatou a’u i le Semi Final ae ou te talitonu e mautinoa lava le tatou oo i le final pe a fua i a’i sa malo ai a’u na oo i Quater, Semi ma le Final. O upu masani a le atunuu: “E LE SILI LE TA”I I LE TAPUA’I” ia paga lea pe a tatou faalogo atu i le faafitauli ua gagana mai i le kapeteni ae lagolagoina e le to’a 8 tama sinia. Ia tatou talia le iuga poo le a le mea o le a oo i ai.