Ua maua le sui o Maa Nonu i le Afafulifaō a le Laumua

Ua mae‘a nei ona saini le suafa o le alii o Tim Bateman mo le suia o le Numera 12 lea sa taalo ai le alii o Maa Nonu i le aulakapi a le Afafulifaō a le Laumua.

E pei ona silafia e le aufaitau ua sifi atu nei Maa Nonu i le kalapu lakapi a Aukilani e taalo ai i le tausaga fou, ma o lea ua mae‘a ona sainia e le alii o Tim Bateman le avanoa o le a taalo ai i le ‘au a le laumua.

O le alii o Tim sa nofo i Iapani, ma o se tama taalo i le Crusaders ma o le midfield back a le ‘au a Niu Sila Maori.

O le a oo mai e taalo i le laumua ma lona silafia lelei le tagata lea o le a ia suia.

Na ta‘ua e Tim i le Dominion: “Ou te taalo soo ia Maa i le tele o taimi ma e tele lava mea e eseese ai a ma taaalo.

Ua leva ona tautaua Maa i lana taalo i le ‘au a le laumua pe tusa ma le 10 tausaga, ae o se mea lena o le a ou taumafai e galue i ai mo ia lu‘i ma ou te lē o popole tele foi i ai.”

O Tim e 12 kilokalama e māmā ai ia Maa Nonu, peitai o le lelei ia o lana taalo i le polo ma e talenia foi i le kiki.

O lona mamafa e tau afaina ai lona agai atu e taalo i le vaega i luga o lakapi. Peitai o le tausaga atoa na ia taalo ai i Iapani, ua maua ai lona tino lapoa, malosi ma lelei ai lana taalo i le saosaoa o le taaloga i lena atunuu.

Fai mai Tim “O le taimi lenei ua tusa e faasefulu ona ou maua le polo i soo se taaloga, ma e avea lena ma mea e faamalosia ai a‘u i le taalo, ma ua ou manatu lava ua avea a‘u ma tagata taalo lelei ona o lena”.

Ua iloa foi e Tim le tulaga lē fiafia na iai le Afafulifaō i le tausaga nei ma taamilosaga sa faia peitai, ua naunau lava e fesoasoani i le faiaoga ia Mark Hammett e faia se isi gaioiga fou mo le ‘au, ma ia faamumū lana taleni taalo mo le faataunuuina o lana miti ia avea ma se tama taalo o le “Olopeleki.

E amata ona taalo Tim mo le Afafulifaō i le vaiaso, a o lei amataina la latou taaloga ma le Stormers i le Aso 25 o Fepuari 2012.

Ae avea foi lenei avanoa e faafetai ma faamalo atu ai le aufaitau o lenei itulau i le susuga ia Maa Nonu ona o le tulai mai faatamataalo taualoa o le aulakapi a le Laumua e faapena foi le Olopeleki.

Malo le finau Maa, ia saga faamanuia atu le Atua i lou soifua taalo mo le tautuaina o Niu Sila aemaise o le igoa pele o Samoa. Ia manuia foi alo o Samoa o loo taaalo mo le sueina o le siamupini o le Ipu o le lalolagi.