Tapuaiga o le ‘Olopeleki
21/10/11 || Tusia: Leautuli Malaeta Sauvao ||
O le afiafi o le Aso Toonai na tea nei, i le itula e 7 na faatumulia ai le taulaga o Porirua i le tele o taaloga ma mea faafiafia mo tagata lautele mo le tapuaia o le taaloga o le sailia o le siamupini o le Ipu o le lalolagi.
O lenei taumafaiga o se galuega faatino a le City Council o Porirua mo tagata lautele auā lava le taaloga i le va o le Olopeleki ma le Kagarū lea na mātele i ai le faatasia o tagata e faaalia le lagolago i le ‘au a Niu Sila.
Tatou talosia le alo atu o le ‘au o loo taaalo ai alo ma fanau a Samoa ina ia manuia.
Na sooatulau mai le isi uo a Sooatulau fai mai, “e sola le All Blacks ma le ipu o le taamilosaga”.
Fesili atu Sooatulau pe aisea ua ia iloa ai, ae tali mai; “e tele ina maua e tama Samoa sikoa o le taaloga lea o le a fai nei”. Ia o le mea lava e talosia ia sa‘o lea tala. E seki a tama Hamo!.
