Susunu e se tamaitai faiaoga lona tino

Na faitauina ma le faanoanoa se tala i se tamaitai faiaoga i le atunuu o Farani, e faapea na ia sasaa le apa suauu i lona tino ma tutu i ai se afi ma mu uma ai lona tino, a o matamata i ai tamaiti o le aoga na mafua ai ona faia e le tamaitai lea tulaga.

O lenei tamaitai ua fiu i le amio lē taupulea o tupulaga i lana vasega, ma o se tulaga sa fai ma mea ua aafia ai lona lē fiafia e galue. O le mafuaaga lea ua ia faia ai lea tulaga lē matagofie i luma o le aoga, a o matamata atu tamaiti.

E feei atu iai tamaiti ae fai mai le tala a lenei faiaoga, “O outou lea ua ou faia ai lenei mea”. E molimau isi faiaoga o le aoga, o lenei tamaitai e masani ona naunau ia usitai tamaiti i ana metotia, ma o ni metotia faafaiaoga ua leva ona galue, ma e foliga e lē fiafia i ai tamaiti.

O le ala lea o le faaalia o uiga lē taupulea o le vasega ma ua fai ma mafatiaga i le mafaufau o le faiaoga ma faatino ai loa lenei tulaga lē lelei.

E lua itu e tatou te vaai i ai faamātua i lenei mea ua tulai mai i lea faiaoga. E masani lava ona maua ai o tatou tamaiti Pasefika i amioga ulavavale nei, o ni isi taimi o le fia mālie ma le fia iloa i luma o isi tamaiti, tusa lava pe lelei le aoaoga a le faiaoga.

O le itu lona lua; o le vaai lea faalefaiaoga i metotia poo talafeagai ma le fiafia o le vasega. O aso nei ua sili ona faatāuaina le faia o mataupu/polokalame e fiafia i ai le fanau (Child-centred programme), nai lo mataupu e manao le faiaoga e fai. Ona ua toatele foi faiaoga Pasefika ua iai nei i kolisi ma aoga tulaga lua, ma e aogā foi lenei tala e fai ma a‘oa‘oga e lē gata i tamaiti, a o faiaoga foi.