Masofa le vaa o Rena i gataifale o Taranaki
21/10/11 || Tusia: Leautuli Malaeta Sauvao ||
Ua tele ina faalogoina le faitio o tagata a lautele o le itumalo o Taranaki, talu le suauu o le Rena e pei ona faasalalau mai pea i le televise ma leitio le paulia ma le masofa ai o lea vaa.
Ua afaina le gataifale e mālōlō ma tafafao i ai tagata i le sami ma matafaga, ae lē gata i lea ua faatamaia figota ma pepē ai manufelelei, aemaise o le ‘ea e mānavaina o le suauu e tagata latalata ane i ai, ua fai lea ma tulaga lē manuia ma le lamatia ai o le soifua maloloina.
E faapea o le kapeteni Filipaina na avea le vaa ma ua taofia nei mo suesuega faatasi ma ni isi o le auvaa.
E tele faitioga i le tuai ona galulue le malo o iai nei mo se togafiti e vave faamamāina ai le suauu ma le tafe atu i gataifale o le siosiomaga.
Ua mautinoa foi le tino i tupe pe tusa ma le $12 i le $13 miliona tala, e faaalu i le faamamāina o lea suauu ma toe faaleleia mea ua afaina ai e pei ona tusia e le Dominion o le Aso Toonai na tea nei.
