Tuufaatasia Iunivesite o le laumua i le faalauiloaina o aoaoga eseese
16/10/11 || Tusia: Leautuli Malaeta Sauvao ||
O le Aso Faraile o le vaiaso na tea nei na faatumulia ai le maota o le Pahina o Tokelau i Porirua i le auai faatasi o Iunivesite ma Politekinika eseese i le laumua e faaalia a latou aoaoga poo courses ua avanoa i ai tagata Pasefika.
O le iunivesite a Vitoria, Massey, ma politekinika a Ueligitone ma Whitireia na latou faaalia ni matata o aoaoga eseese e pei o le faafomai, faainisinia, faieletise, faafaiaoga, faapisinisi, palama ma le tele o ituaiga matata e tele na faalauiloaina mo le silafia o o tatou tagata Pasefika.
O nei lava faalauiloaga e aogā tele mo le toe lu‘iina o le taumafai o tagata Pasefika i ni faailoga faaleatamai (degrees) e maua ai le tomai mai ia matata, auā ni galuega lelei mo le lumanai.
Ua iai foi le faamoemoe e faatuina se kolisi i totonu o Porirua mo tagata matutua e fia faalauteleina le tomai i tulaga tau aoaoga, ma ua faasalalauina foi i luga o le Siufofoga o le Laumua ni fonotaga mo tagata uma o le laumua e fia auai i lea faamoemoe.
Tele avanoa ua maua nei e o tatou tagata, aemaise le toe faaleleia o le tulaga tau i aoaoga.
