Oti faafuasei a o faatali lona taimi (appointment) e vaai lana fomai

O le Aso Tofi na tea nei, i le fale o gasegase vaaia(clinic) a le Union Health i Porirua na faateia ai le vaai a le Sooatulau i lenei tamā o savali mai i totonu o le fale ma nofo e tusa o le lua nofoa la te va ai.

Pe tusa ma le 10 minute talu ona saofai ae vaaia loa e le Sooatulau ua mimigi i luga lima agai i le fatafata o lenei tamā ma ua pupula sioa ona mata. Na nati atu le Sooatulau i le teine(receptionist) e logo se fomai.

Sau le fomai tamaitai e tau sii mai le ogamanava e maua i le maitaga, toe vave loa le valaau mai i le Sooatulau pe mafai ona fesoasoani e faataoto i lalo i le kapeta le tamā lenei ua pa‘ū faagaulua i luga o nofoa, ma toe nati atu e faavave mai se fomai (Dr).

Taunuu le Dr ma faatino le mānava i le gutu(CPR), toe faalogo ma vaai pe o tātā ona uaua mānava, peitai ua leai lava. Ona faapea foi lea ona toe nanati e vili le Ambulance.

E tusa ma le luasefulu minute ae taunuu le taavale a le falemai ma toe faatino foi e tagata pe toafitu lenei ua o mai ma faagaau faapea fagu kesi o le Okesene le CPR, peitai ua siliga tali i seu le faamoemoe ola.

O le tamā lenei o se Maori, ma o le tala a fomai(nurses) e masani ona alu atu e siaki lona fatu, ona e ma‘i fatu si toeaina. Ua taufai misi alofa i ai fomai ona e fai mai latou e ese le amio maulalo o si nei tamā. E lē pei o isi ma‘i, e tuai loa ona sau le fomai e vaai, amata ona faitio ma lē lava le onosai.

Ua faamanatu mai e lenei mea ua tupu le olaga o tatou iai nei. E lē iloa lava le taimi e valaau mai ai le Alii ia te oe ma a‘u. E te evaeva lava nei, ae e te lē iloa lava le minute e valaau mai ai oe ma a‘u i le vaa tuusa‘o poo le malaga alu motu.