Faamafanafanaina o fale e nonofo ai
16/10/11 || Tusia: Leautuli Malaeta Sauvao ||
O loo faalogoina pea i luga o leitio le polokalame a le malo lea o loo taumafai e faamafanafana fale o tagata, ae maua mai se vaega tupe mai le malo e fesoasoani ai i le tau.
Ua tele ina tuufesili tagata pe aisea ua faamamulu mai ai nei vaega tupe a le malo i lenei vaitami o le tausaga, pe ai o le lata i le palota lea ua tasoo mai ai faasalalauga, ua lē gata i le leitio ae ua faapea foi i le Televise.
Maumau pe ana faapea e fai fua e le malo ia galuega mo tagata e ona fale faatau, auā ua sii tele le tau o le lafoga (rates) lea e totogi i le ta‘i lua vaiaso. Ua tele foi le aumatutua, ua na o le penefiti itiiti e maua, ma lē mafai ai ona totogi nei vaega tupe.
Afai ua mae‘a ona faamafanafanaina lou maota ona aua lea le maumauina lou taimi e toe faaalu ai ni isi tupe, auā e silia ma le $4000 le totogi o le faamafanafanaina o le fale atoa i ni isi o aiga. E na o le $1300 e aumai e le malo ae e te totogia faavaitaimi le paleni telē i tausaga e fia.
E uma ane ua tele foi le tupe e alu ai i le faaopoopo o le tupe tului (interest). Ia mataala o tatou tagata i lea tulaga ma ia aua le seetia i le malū o le tai taeao e pei o ia muagagana, ae faauta lelei lau faasoasoa.
