Camp Fiafia tamaiti Pasefika i Forest Lakes i Otaki
16/10/11 || Tusia: Leautuli Malaeta Sauvao ||
O le Aso Faraile i le afiafi na tea nei na malaga atu ai le pasi a tamaiti o le Aoga Aso Sa a le Ekalesia PIC i Forest Lakes e tafafao ai mo le faaiuga o le vaiaso. O lenei Aoga Aso Sa e iai tamaiti Tuvalu, Samoa, Tokelau, Kuki Airani, Maori ma tamaiti Afakasi.
O le Aso Toonai na amataina taaloga eseese i totonu ma fafo o le camp site ma na vaaia le fiafia o le fanau ina ua faasee i le faaseega, alo paopao, faasee i le flying fox, taeele i le vai taele ma le anoano o taaloga i totonu o le faletaalo.
O le autū foi o lenei tafaoga o le faalauteleina lea o le mafuta faatasi ma le galulue faatasi o tamaiti e ala i galuega ma taaloga faaleaoaoga e mafuta ai ma mātua ma faiaoga.
E lei tuulafoaina foi i le vaaiga a le Taitaifono Aoao o le Matagaluega i le laumua i Ueligitone(Moderator) le susuga ia Perema Leasi lenei vaega o le galuega a le fanau ma faiaoga aemaise o mātua.
Na faapea lava ona auai mai le uluai aso seia oo lava i le aso faaiu o le mafutaga.
O le itu tāua na vaaia e le Sooatulau o le mataalia o le taitai ia Povalu Kelemete ma Veronika Vaovasa faapea le taitai o le Ignition ia Joanne Tito Kisona ma faiaoga uma i le polokalame na faatinoina mo le fanau ma mātua na auai.
O se vaaiga lelei foi le matauina o tiutefai a tama ma teine i le vaaiga o le hall i le fufuluina o ipu ma faamamā mea uma ina ia maua pea le saogalemu faalesoifua maloloina o le mafutaga.
O le koneseti sa faaiu ai le po mulimuli o le mafutaga, ma sa matuā vaaia le fiafia o le fanau i la latou mafutaga atoa. E tele foi lo latou aoaoga na maua mai ai i mafutaga faatasi faapenei.
E avatu ai le faamalo a le Sooatulau i le vasega o faiaoga Aso Sa, sui o le autalavou matutua(Ignition) ma mātua uma na auai e lagolago le faamoemoe o le fanau. E faapitoa foi le faamalo i mātua ma aiga na lagolago i sailiga tupe mo lenei faamoemoe
