Mālie le maimoaga i le Ipu o le Lalolagi
28/09/11 || Tusia: Leautuli Malaeta Sauvao ||
Na meli mai le uo a le Sooatulau ma ‘ata i le tala a le isi alii papalagi na alu e maimoa le taaloga amata o le Ipu.
E taunuu atu le alii lea o iai le nofoa e tasi lava o loo avanoa mai i se tasi o laina o nofoa o le aumaimoa. Fesili loa i le tamaloa lea e nofo sosoo ma le nofoa avanoa pe o ai e nofo i le nofoa lea. Tali le tamaloa:
“Nofo ai e leai se isi e nofo ai.” Ua nofo atu loa le papalagi ma faapea lana tala, “Poo ai lava lenei tagata ua lē sau i lona nofoa i le taaloga ua o mai uma i ai tagata eseese o le lalolagi?”
Tamaloa: “O le nofoa o lo‘u toalua, e lē misi lava se ipu o le lalolagi ona ma o ai ma te matamata. Ua lē sau ona o ua maliu. O le ala lea o le avanoa o lona nofoa ae ua uma ona totogi lana pepa.”
Papalagi: “Oi e leai lava se isi o lou aiga poo sau uo e ave i ai lana pepa e sau ai e faaaogā le tupe ua totogi ai le nofoa?”
Tamaloa: “E leai se isi o a‘u uo ma o‘u uso ma o‘u tuafāfine ma lo‘u aiga uma e avanoa, o loo o uma i le tanuga o lo‘u toalua”.
‘Ata e e loa ma Sooatulau ma faapea lana tala; “Manaia foi le Ipu o le Lalolagi ua lē kea ai ma isi tamaloloa ia latou tautoga ma taitoalua”.
Manaia foi sia ‘ata e maua ai le fiafia. E ui lava ina lē mālie, ae tiga le lē tausi feagaiga e oo i le oti.
