Faapaiaina ni isi o alo ma fanau mai le laumua

O le Aso Toonai 10 o Setema na faatumulia ai le hall i le Akapuanga i Cannons Creek, Porirua i le fiafia o le faaipoipoga a le tamaitai o Joanne Leiua ma le alii o Tito Junior Kisona.
O Joanne o le alo o le fetalaiga ia Fata Malo mai Afega ma Faatali Lei‘ua mai Saleaula ma Toelau, o le ekalesia PIPC i Porirua. O le alii faaipoipo o Tito o le alo o Tito Snr ma le faletua ia Lapae Kisona e mai Toelau uma i laua.
O le faapaiaga o le ulugalii fou na taitaia e le susuga i le faafeagaiga taulagi o le ekalesia PIPC lava i Porirua ma na mae‘a le sauniga ona faagasolo lea i le Maota e pei ona ta‘ua i luga mo le taumafataga ma le polokalame masani o faaipoipoga.

O Joanne ma Tito o ni taitai o le vaega o le Ignition ma le Autalavou laiti a le ekalesia ma ua leva foi o la tautua i lea galuega faataitai, ma ua masani ai lava ma fai ai le faigauo ma faapea loa ona mananao e faaipoipoina i laua.

O se aso fiafia ma le tumu tele o aiga aemaise lava o le tupulaga ma uo a le ulugalii fou mai i o la fale faigaluega. Na faamalieina foi le auvalaaulia i le taumafataga tele na saunia e aiga na lua ma faaaloaloga masani foi sa faatino i le Aufaigaluega paia.
O le uso laitiiti o le tamaitai faaipoipo o Sioliana (Lana) Maora na fai ma fofoga o le aso (MC) a o le fetalaiga ia Auimatagi o le aiga o le tama o le tamaitai faaipoipo na fai ma fofoga o aiga na lua. A o le susuga i le Fofoga o le Ekalesia le fetalaiga ia Lio Fanaea Paese na fai ma fofoga o le Aufaigaluega ma le ekalesia e faafetaia faaaloaloga matagofie a le paia o aiga na lua.

Manuia lo lua aiga fou Joanne ma Tito, ia fua faatatau le niu ua tele le vaivai o le tamaoaiga o le lalolagi i nei aso.