Penisiona mālōlō le susuga i le Toeaina ia Ioritana Laau Tanielu ma le faletua Dr Lonise Tanielu

O le Aso Sa, 30 o Aukuso na faatumulia ai le malumalu o le Ekalesia i Grey Lynn i le susū ai o le aufaigaluega paia a le Atua mai le Pulega faapea le aulotu toatele ma uo ma ē masani, faapea aiga o le susuga i le Toeaina ma lona faletua, i le sauniga e faamavae atu ai i le susuga i le Toeaina.
E 19 tausaga na taitaia ai e le susuga i le Toeaina ma le faletua le galuega i le ekalesia tele i Grey Lynn i Aukilani. E 42 tausaga o la laua auaunaga i le Ekalesia tele i Samoa (EFKS) ma o lea ua mālōlō ai nei faapenisiona i le tausaga nei.
O le susuga i le Toeaina Ioritana Tanielu FT FS (EFKS) ThM(Princeton, USA), BD(PTC) Dip h(Malua), Cert.RK(London) o le lupe na faalele mai i le ofaga i fogatia o afioaga o Saleaula ma Safotu i Salafai. O lona soifua a‘oa‘oina o le Kolisi i Avele, Kolisi i Leulumoega Fou ma faasolo atu ai i Malua ma maua lona Dip of Theology.
Na faasikolasipi atu i le Iunivesite o Lonetona i Peretania ma maua ai Tusipasi o le Certificate in Theological Knowledge.
Na toe faasikolasipi i le Pacific Theological College i Suva ma faamanuiaina ai i le faailoga o le Bachelor of Divinity. Na toe a‘oa‘oina foi i Princeton Theological Seminary i Amerika (USA) ma faamanuiaina ai i le faailoga o le Master of Theology..
O lana auaunaga i le Ekalesia:
Sa galue i le Ofisa o A‘oa‘oga Kerisiano i le 1969, Faiaoga i le Kolisi Faafaifeau i Malua 1969-1978, Sui Pule i le Kolisi i Malua i le 1976-1978, Faaiaoga Kolisi Faafaifeau Pasefika i Suva 1979-1981, Faifeau EFKS Porirua 1981-1988, Failautusi Aoao EFKS 1988-1992, Faifeau EFKS i Grey Lynn 1992-2011.
E lē faitaulia ai tofi e tele na tautua ai faa-Peresitene ma Taitaifono i le tele o faalapotopotoga faakerisiano ma faapulega ma matagaluega. O se auauna aogā mo le Ekalesia e pei ona silasila ane i ana auaunaga i soo se tofi.
Na vaaia lava le loifofoga maligi o ni isi o le Ekalesia ina ua faamavae ma le susuga i le Toeaina ma le faletua ia Dr Lonise Tanielu aemaise ai o le nofoaalo ua leva tausaga o ola a‘e i le ekalesia ma mafuta ma tagata lotu i Grey Lynn.
Na mae‘a le tele o saunoaga faamavae mai le susuga i le Toeaina ma le faletua ma le nofoaalo, ona valaau faaaloalo lea o le fofoga o le ekalesia mo le taumafataga i le Maota o le Ekalesia ina ia auai atu i ai le aufaigaluega o le Pulega, uo ma ē masani faapea aiga o le susuga ia Ioritana ma Lonise aemaise o le ekalesia.
E pei lava ona masani ai tulaga o faamavaega, o le Keke na saunia e le Mafutaga a Tina sa alaina e le Toeaina ma le faletua faasolo ai foi le polokalame i faafiafiaga ma saunoaga taumavae.
E momoli atu ai foi le faamalo ma le faamanuia a le Sooatulau ma le Samoa Times i nei auauna faamaoni i le tautuaina o le Atua aemaise o le lautele o tagata Samoa ma soo se tagata i tofi ma tiute uma na laua auauna ai.