Faapaiaga o le togiga a le aulakapi o le afioaga o Nofoalii

O le Aso Toonai na tea nei i le maninoa ma le toafilemu o le taeao i le Anetonio Hall i Porirua na faapaiaina ai e le susuga i le Faafeagaiga o le PIPC o Rev. Perema Leasi le togiga matagofie a le aulakapi a Nofoalii e ala i le tapuaiga ma le viiga faafetai i le Atua ona o le faataunuuina manuia o le faamoemoe o le Komiti ma le aulakapi ua leva ona taumafai i ai.
Sa faalaeiau le faafeagaiga ina ia maua le loto gatasi ma le fealofani e le ‘au taaalo ma le komiti ma le afioaga atoa. E tusa pe faia‘ina ae ia maua le fiafia ma le amio pulea ma le loto maulalo e faaeaina ai.
O le mea e sili ia faatuatua i le Atua le Kapeteni Sili e maua ai le malosi ma le atamai toafilemu i luga o le malae taalo. Sa faapea foi ona ia faamanuia i le aulakapi ma le Komiti mo le faamoemoe mo le taamilosaga.
O le togiga e lanu uliuli ma e tusia ai lava le igoa: ‘Nofoalii’ i tua o le ofu i luga, a o luma e iai le ata o le rosa pa‘epa‘e e pei lava o le togiga a le aulakapi a Nofoalii i Samoa. Silasila ane i ata o loo iai i le pepa.
Na auai foi le fetalaiga ia Namulauulu Puni Brown, o le Peresitene o le Komiti o le taamilosaga mo le Ipu a le Pasefika (Pacific Cup Tournament) i Ueligitone. Sa ia fetalai fiafia ma ta‘ua o le aulakapi lenei a Nofoalii e tulaga muamua i le amio pulea o tama taaalo.
E tusa lava pe faia‘ina e vaaia pea le amio pulea lelei i luga o le malae, ma o le sae ia o faigamea. E lē o le malo, ae o le fealofani ma le pulea lelei o amio a le tupulaga e matuā tāua lea. Na ia faafetaia ai foi le komiti o le aulakapi ma faamanuia i le autaaalo mo le faamoemoe.
O le fetalaiga ia Masame Pesa Felise, o le sui o le Komiti, sa fai ma fofoga o le aso. O le susuga ia Tanuvasa Petelo, le failautusi o le Komiti na saunoaina le lipoti o le aulakapi ma lona faavaeina.
O le susuga ia Tanuvasa Vaatausili Sauvao, le Taitaifono o le Komiti o le ‘au na saunoa e faafetaia le auvalaaulia ma le mamalu na aofia mai i lea aso.