Selautausagaolelotu Ioane Seumanufagai: Tofaina oe!
13/09/11 || Tusia: Leautuli Malaeta Sauvao ||
.
Na faamavae atu le nofoaalo, aiga ma le ekalesia i le Tina mālōlō ia Selau Ioane Seumanufagai ina ua faamanavaina ana galuega e ala i le valaau paia a le Atua. O se aso maninoa ma le lagilelei na faasolo ai le polokalame o le falelauasiga o le tina, ina ua taunuu faafeagaiga ma amatalia toe sauniga i le Aso Gafua 22 o Aukuso. E maliu le tina ua 81 ona tausaga.
O lona alii le susuga i le faafeagaiga ia Ioane Seumanufagai na la galulue faifeau i le ekalesia EFKS i Vaipu’a mo ni tausaga se tele, ma na maliu ai le susuga ia Ioane i le tausaga e 1972. Na toe foi ai Selau ma le nofoaalo e toaiva i le aiga o lona tina i Vaovai i Falealili. O lona tuaa tamā o Su’a i Salelavalu mai le Faasaleleaga.
Na malaga mai i Niu Sila ma tapuai ai i le ekalesia PIPC i Porirua seia oo lava ina valaauina e le Atua.
O se tina e sili ona pele ia te ia le galuega a le Atua. Na galue foi faaperesitene o le Mafutaga a Tina o le Ekalesia mo le lua tausaga, ina ua tuua le malo e le tina o le Ekalesia ia Oliana Leasi. O se tasi o ona alo o Iefata Ioane, o loo auauna ai i le tofi Tiakono, a o se tasi o ona alo tamaitai ia Eseta o loo pule nei i le Kolisi o le Tusi Paia i Ueligitone.
O fua lelei ia o galuega a lenei Tina o le tautua lotu ma le faamaoni i le finagalo o le Atua. Tele galuega ma a’oa’oga matagofie na faatinoina e lenei tina lelei mo lona aiga aemaise lava le galuega a le Atua. Ua matou misia lenei auauna faamaoni. Na matuā faamalieina foi le ‘Aufaigaluega Paia a le Atua ma le Ekalesia i faaaloaloga matagofie na alo i ai le nofoaalo ma le paia o aiga na lua.
E momoli atu ai foi faamafanafanaga a le Sooatulau mo le afioga i le Tiakono ia Iefata Ioane ma le faletua ia Feagiai faapea le fanau pele ma aiga uma aemaise le ekalesia ua tuua.
