Matagofie le faataunuuina o le fono mo le taofia o sauaga i le laumua

O le Aso Faraile ma le Aso Toonai na tea nei na faatumulia ai le maota o le Nokise House i le ekalesia o Tagata Pasefika o le Perepereane (PIPC) i Newtown, i tagata mai soo se matagaluega, ekalesia aemaise o a‘oa‘oga i le fia maua atili o le malamalamaga i ni auala e foia ai soo se ituaiga o sauaga e pei ona vaaia i nei ona po. E tusa ma le 200 ma ona tupu i latou na auai.
O le saunoaga amata a le afioga i le Komesina Sili o Samoa; Afioga Asi Tuiataga Blakelock na ia ta‘ua ai le taua o le alofa, faatuatua ma le faaaloalo e mafai ai ona fofo ia faafitauli o loo vaaia pea i totonu o aiga, nuu ma soo se mea.
Na saunoa le afioga i le Minisita o Tina; Hon. Hekia Parata i le taua o le iloa e oe o oe lava, aemaise ai foi le faasilasila i le fono atoa le itu tau tupe e mafai ona fesoasoani ai le malo i le faatupeina o faalapotopotoga taitasi o loo taumafai e galulue mo le puipuia o sauaga.
Na ia fautua foi, e le mafai e le malo o loo iai nei ona latou faatupeina le anoano o galuega eseese o loo taumafai malosi ai e foia sauaga, ona o le tulaga tau tupe o loo iai nei le atunuu ma lona tamaoaiga, talu ai faafitauli o faalavelave faanatura o loo aafia ai pea le aai i Kalaiesetete, ma o loo taumafai malosi i ai le malo e faaleleia.
O le saunoaga autu o le fonotaga na saunoa i ai le afioga i le tamaitai faamasino ia Ida Malosi. O ia o le uluai faamasino Pasefika i totonu o Niu Sila, ma sa ia faaalia ai lona tulai mai faa faamasino i le aai tele i Aukilani ma le anoano o faamasinoga e aafia ai le tupulaga talavou ona o soo se sauaga o loo tulai mai pea. Na ia faatauaina le itu i le aganuu ma lona taua i lona feagai ai ma le tofi faa faamasino.
Na matagofie foi le auai mai o le Ofisa o leoleo e faamatala la latou foi matafaioi i le fesoasoani pea e foia faafitauli e uiga lava i sauaga. Manaia le faapupula mai o faamaumauga e uiga i le aofai o tagata o loo feagai pea i nei lava faafitauli ma e maualuga ai lava le numera o tagata Samoa sauaina nai lo soo se isi atunuu o le Pasefika.
E toatolu ni sui o le Ofisa o Tamaiti ma Aiga (Children and Young Families) na latou faasoa mai i le taua o le fesootai atu i o latou tagata o loo faia lea tautua, ae aua le mumusu e faailoa atu ni mafatiaga o feagai ai ma fanau, ina ia vave maua le fesoasoani a o lei telē le faafitauli. O loo fia maua foi ni aiga e mafai ona avea ma tagata e fesoasoani i le tausiga o nai fanau ua sauaina, nai lo le ave i aiga e le masani pe tutusa a latou aganuu.
Tele ni fesili na faamalieina ina ua tali mai e i latou o loo feagai ma ia tautua, ma o se fiafiaga sili lea o le auusufono ona ua mafai ona faasoa mai le tomai o i latou o loo galulue mo le lelei o aiga afaina.
O le Aso Toonai na feagai lea ma ni faasoa na aumai i ni sui o faalapotopotoga nei o loo latou fesoasoani e foia nei sauaga. O le Street Ahead, Folau Alofa Trust ma se sui o le Ofisa o Plunket.
Sa ese foi lagona o le auusufono i le faasoa mai o nei sui ona o le tele foi o tagata e fou le faalogo i le Street Ahead ona o lea faato‘a amata lea auaunaga i le amataga o le tausaga nei i totonu o le aai o Porirua, ae ua ova ma le 90 aiga ma tupulaga o loo latou taumafai e faaleleia olaga mai sauaga eseese.
O fesili e tolu na faatalanoaina i vaega e sefulu o le fono: 1. O le a se faiga e mafai ai e tagata, ofisa (agencies) poo faalapotopotoga o loo galulue nei e feagai ma lea tautua e faaleleia ai a latou auaunaga?
• O le a se mea e ao ona tatou fai e fesoasoani ai i ni auala lelei e talafeagai mo aiga Pasefika ma tagata lautele?
• O le a se galuega e ao ona fai e ekalesia/lotu e foia ai nei sauaga? E faapefea ona fesootai atu i ni ala talafeagai ma tagata lautele?
E tele ni faasoa aoga ma le taua na faaalia, a o le itu i le lotu, na silisili lava le manatu e le na o le faifeau e faia le galuega, e lavea ai soo se vaega o le ekalesia e pei o Autalavou, Mafutaga a Tina, Tiakono ma soo se vaega o le lotu/ekalesia e ao ona galulue faatasi tagata lotu uma.
Na saunoa le afioga i le Vice Chancellor Pasefika o le Iuniveste o Vitoria, Luamanuvao Winnie Laban e taualugaina finagalo tuufaatasi o lenei fono taua ma ia faafetaia aloaia ai le Komiti Tapena mo le galuega fita, faapea tootoo na valaaulia, aemaise le susuga i le Taitaifono Rev. Tauinaola Tofilau o le Komiti Tapena, Rev. Elama Maea faapea Rev. Perema Leasi ma le Matagaluega o le Fono Samoa i Ueligitone faapea le Ofisa Lagolago o le Perepereane mo le finagalo a‘e e tusa o lenei fono tāua, auā lava le manuia lautele o le fanau a le Atua.
Na ia faafetaia foi le Fofoga o le aso Rev. Chris Nichols ma le Mafutaga a Tina o le ekalesia i Newtown sa feagai ma le gaseseina o taumafa o le fonotaga atoa. E faafetaia foi le mamalu o le atunuu ma sui o ofisa ma aoga eseese na auai mo le faalauteleina o le silafia i le foia o sauaga