Haka fou, siamupini fou

O le afiafi o le Aso Lulu na tea nei i totonu o le malae taalo i Porirua, na faataunuuina ai le suega o le siamupini, i le va o le Kolisi a Mana ma le Kolisi a Porirua i le taaloga lakapi a le 1st.XV mo le faailoga o le Beard Trophy.

A o faatali atu le ‘aumaimoa ina ua i totonu ‘au e lua i luga o le malae na ese le tulaga na tatala ai le taaloga.

O le haka fou na faatinoina e le Kolisi a Porirua na matuā mataina le matagofie o le taumafai a le ‘autaaalo ina ua faaaogāina gagana eseese a le Pasefika faatasi ai ma le gagana o le haka masani a Maori; Ka mate! ka mate! Na logoina mai e se tasi o tamā lagolago, le fetalaiga ia Manusina Levaopolo Finau e faapea na mae‘a ona faanoi lelei le pulega o le ‘au i Kaumatua Maori mo le faaaogāina o le haka ina ia tuufaatasi ma le haka i gagana a le Pasefika. O se taumafaiga matagofie foi lea ua faatino e ala i se haka fou ua mafai ona faatinoina.

Na matuā pati le ‘aumaimoa aemaise lava tamaiti o le Kolisi a Porirua a o faatino e le ‘autaaalo lea foi haka fou. Ia e iai le matega o le haka fou lea ua maua ai e Porirua le siamupini fou.
Na tali mai foi le ‘autaalo a Mana i la latou foi haka na mālie foi i le maimoa i lea po.

O le amataga o le taaloga na vaaia le mataalia o tama taalo a le Kolisi a Porirua i le pasiga o le polo ma le pue malosi. Na muamua sikoa Porirua i le faato‘ā 14 minute ma sekone e 13 talu ona amata le faagatama. Kiki ma le polo maua ai ‘ai e 7. Sosoo ma le sala na kiki ova maua ai le 10 o ‘ai ae leai se ‘ai a Mana. Na faagasolo pea le taaloga seia oo i le ‘afa o le taaloga, o tumau pea le 10 o ‘ai a Porirua ae leai Mana.

O le ‘afa mulimuli na matuā faaatoa ai le puipuia o le ‘au a Mana e tama taaalo a Porirua, peitai na iu lava ina sikoa le ‘au a Mana, kiki le polo e lē ova ona 5 ai lea o ‘ai a Mana i le 10 a Porirua.

Na tumau le osofai a le ‘au a Porirua ma le pueina o le polo, ae na faapea foi le taumafai mai o le ‘au a Mana.
O le lata i le faaiuga o le taimi na toe sikoa ai Porirua ma manumalo ai i le 15 ‘ai i le 5 a le Kolisi a Mana, ma manumalo ai Porirua i le Beard Trophy.

Na ta‘ua e se tasi o matua e faapea o le faato‘ā mafai lea ona suia le siamupini talu mai le fa pe lima tausaga o mau ai le ipu o le siamupini i le Kolisi a Mana.

O le matagofie o ia taaloga ona e leai se fusuaga na vaaia e pei ona iai isi ‘au pe a sue le siamupini o se taaloga.
E faamalo atu ai le Sooatulau i le 1st. XV a le Kolisi a Porirua mo le taalo lelei ma le faiga o le haka fou matagofie.

E faamalo atu foi i le 1st.XV a le Kolisi a Mana ona o le mau ai o le ipu o le Beard Trophy i ni tausaga sosoo e fa – lima. Faamalolosi, ia filifili mai ia outou ni tama taaalo o le Olopeleki.