Faimeaalofa le afafine i le Aso Soifua o le tamā

E muamua ona sii le faafetai ma le viiga i le Atua, ona o mea silisili ma le ofoofogia ua ia faia mo lana fanau. I le aso 28 o Me, na faailogaina ai le 50 tausaga o le soifua o le tamā ia Joe Lolani.

Ae o se fiafiaga tele i lenei aiga ona o le aso 24 o Me, i lena lava foi vaiaso, na faauu ai si ona afafine o Gwen Lolani, ina ua ia tauaaoina se faailoga poo se Tikeri tāua, le “Bachelor of Applied Communication.”

O se meaalofa sili lea ua faimeaaloga ai lenei afafine i le faamanatuina o le aso soifua o si ona tamā. E olioli o matou loto ma agaga ona ua mafai e oulua ona aulia mai i le alofa o le Atua nei aso tāua i o oulua olaga. Gwen, malo le tauivi, malo le onosai.

Ua moni le upu a le atunuu, “E, ua ou fia Falealili fua” ma le upu a le Tusi, “O le tama poto e fiafia ai le tamā”.

Se mea ina a lelei tele ma matagofie o le vaai atu i fanau ua oo i nei tulaga faaeaina.
Faamanuia le Atua i lua fuafuaga mo le lumanai. Alofaaga mai i o tatou aiga uma lava o loo papaaao i Niu Sila, Ausetalia, Samoa, Tutuila ma Amerika, ae faasilisili ai alofaaga mai ia Manah, Rachel, Aruna, Carol, Lynette, Dheroleen, Fernanda, Fajzelh, Fhallon ma Fanu.