Aoga Amata a Nuanua ma le Sisigafu‘a
10/06/11 || Tusia: Leautuli Malaeta Sauvao ||
O le Aso Tofi, 2 o Iuni na matuā faatinoina ai e le fanau laiti le sisiina o le fu‘a a Samoa e faailoga ai le Tutoatasi ma le Vaiaso o le Gagana Samoa.
O faiaoga ma mātua na latou galulue malosi i le faiga o galuega e faaaogāina ai taaloga, pese, tauloto, tala faafagogo ma taumafa Samoa i lea aso. Na auai foi sui o le FAGASA, le afioga ia Afamasaga Maugaleoo ma Lilly Afamasaga mo le faamatalaina o tala faafagogo i tamaiti.
O lenei aoga o loo faauluulu i le tamaitai palagi o Rose Duffy ma e aooga faatasi ai tamaiti Toelau ma tamaiti Samoa. Na saunoa le tamaitai pule, o loo ia taumafai malosi i faiaoga e faaaogā le gagana Samoa ma le gagana Toelau mo tamaiti auā o le mafuaaga lena o le auina atu e mātua o o latou alo ina ia a‘oa‘oina le gagana Samoa ma le gagana Toelau.
O le amataga o le tausaga nei na oo atu ai sui o le Wellington Kindergarten Association i le ekalesia PIPC i Porirua e logoina atu le fuafuaga o le faateleina o le faleaoga ina ia mafai ai ona galulue tamaiti ma faiaoga Samoa i le a‘oa‘oina o le gagana Samoa i lo latou potu, e faapea foi i faiaoga ma tamaiti Toelau mo le latou foi gagana i lo latou foi potu aoga.
O loo faapea ona moemiti i ai le vasega o faiaoga ma mātua aemaise o le ekalesia ina ia vave oo mai le aso e mae‘a ai lea fuafuaga i le faatelēina o le faleaoga ua leva ona moemiti i ai
