Faamanatuina le Tutoatasi o Samoa e Whitireia New Zealand
4/06/11 || Tusia: Leautuli Malaeta Sauvao ||
O le vaiaso lenei ua alo atu ai tama ma teine faapea faiaoga o Whitireia e faamanatuina le 49 tausaga talu ona tutoatasi lo tatou atunuu. O le a faia lea i le Aso Lulu, aso 1 Iuni 2011.
O le a sisiina le fu‘a/tagavai o le malo o Samoa i le taeao, sosoo ai ma le sauniga lotu e taitaia e le susuga ia Nove Vailaau. O le vaiaso foi lenei e laei puletasi uma ai tamaitai, ae lavalava ie ma ‘ula i ‘ulafala alii. O teuga faasamoa lava o le a laeiina.
O tauvaga valugā popo seia oo i le tatauina o le penu, faapea ma tauvaga Samoan Idol e faia i le aoga i le Aso Lulu lava lea. E faafiafia ai foi tama ma teine o le Performing Arts i Whitireia ma o le a avanoa foi soo se tasi e auai.
E faaiu i le taumafataga faasamoa e saunia lava e le asosi o tama ma teine faapea le komiti o fesootaiga ma le Pasefika (Pacific Liaison team).
O totonu o le faletusi o le aoga ua teuteuina i mea taulima faasamoa, faatasi ai ma igoa/upu ua faaigoaina ai mo le Vaiaso o le Gagana Samoa. Ua faatumulia foi fatatusi i tusi Samoa ma tusi mai le Pasefika e faalautele ai le silafia ia Samoa ma le Atupasefika.
E talia soo se tasi o le vaiaai o Porirua ma Ueligitone e silasila i nei galuega matagofie mo le faamanatuina o le Tutoatasi ma le Vaiaso o le Gagana Samoa.
