Aafia aoga a si fanau ona o lologa i le laumua
4/06/11 || Tusia: Leautuli Malaeta Sauvao ||
E toalua ni aoga i totonu o Porirua; Maraeroa (primary) ma Toru Fetu Kindergarten na matuā aafia tele i lologa ona o le mamafa o timuga i le vaiaso na tea nei.
Na ta‘ua e le nusipepa o le City Life ua fai aoga a si fanau i le aoga a Maraeroa i totonu o le latou hall, ona ua matuā faaleagaina potu aoga i le loloto o le tatafe o timuga. E faapena foi i le Toru Fetu Kindergarten ona o nei aoga e lua e tuaoi lelei.
O potu aoga e tolu na faapena ona faaleagaina e timuga ma na taumafai ai e faaaogā potu na tau feoloolo le susū. Na lē oo ai ni aoga a si fanau i nai aso ona o nei faafitauli tau i le natura.
O le mea lava e faafetai ai, ona na o timuga ma tafega, ae lē o ni mafui‘e ma ni galulolo e pei ona faalogoina i ni isi vaega o le lalolagi. E tatou te saga faafetaia ai pea le alofa ma le tausi faasoifua a lo tatou Atua ia i tatou i lenei vaega o le lalolagi.
