O le viiga i le Atua ina ua tau lau o le faamoemoe

‘O faiva e tapuaia, o faiva na e a‘e manuia’. A tuu mai i le itu tau a‘oa‘oga, pe i le atamai faalelalolagi nei poo le atamai faaleatua, o le leo lava lea e tasi e lagonaina i aso faapenei, ‘o se faamoemoe sa tapuaia ma tuu atu i luma o le Atua i talosaga, o lenei ua tali faaaliali mai ina ua tau lau o le faamoemoe, ua iu manuia taumafaiga a lana fanau.

O le afiafipo o le Aso Toonai na tea nei i le fale o taumafataga, le Buffet King Restaurant i Manukau, sa potopoto ai mātua, o tauaiga, aemaise uo mamae ma mātua i la le tala lelei, e muai momoli le viiga ma le faafetai i le Atua, ma faamanatu ai i se taumafataga matagofie, le faauuga o le susuga Sioa Letalu.

O se afiafi na tumu i lagona ma upu o le fiafia ma le faagaeetia, aemaise foi le faamanatuina o le agalelei ma le faamaoni o le alofa o le Atua i soifua o le susuga Sioa ma si ona aiga, le faletua ia Ruanna. Sa faaleo ai foi i lena faatasiga le faafetai sa momoli faapitoa i susuga i faafeagaiga o le ekalesia a Sioa, le IMMANUEL WORSHIP CENTRE EAST TAMAKI, Pastor Michael & Runnitty Peteru, ona o tatalo ma le alofa sa faaalia a o alo atu Sioa i lona faamoemoe.

E lei galo foi le faafetai faapitoa mo aiga uma o Sioa ma Ruanna, i o la mātua, aiga uma ma la uo mamae o ē sa lagolagosua ma tapuaia le faamoemoe, ma auai atu foi i lena afiafi e molimauina lenei aso faamanatu tāua.

O Sioa ma Ruanna e toatasi si o la alo, le atalii ia Leyton Jean Letalu ua 9 ona tausaga. E ui le itiiti o le atalii, ae na momoli i ai le faafetai a ona mātua, auā sa telē lona sao i le faataulauina o faamoemoega o ona mātua.

O matua o Sioa: Lokeni Aulaumea & Lesa Letalu. O matua o le faletua ia Ruanna: Usuivao Tagaloasa & Meafua Gaoa.