Toe taliu le alii a‘oa‘o Piula i Samoa mai lana tuuaga i le Motu i Saute
24/01/11 || Tusia: Tala Milo ||
Elisara Elisara(faifeau malolo) Rev Ale Palelei (Tausi Matagaluega) Mighty Taiulu(a’oa’o Piula) Lasalo Tuilagi(faifeau malolo) matagaluega Kalaiesetete
… Ia manatua le mea ua faia e le Atua mo oe …..
O le alii a‘oa‘o o Mighty Taiulu 24 tausaga o lona soifua, lea o loo aotauina i le Kolisi Faafaifeau a le Ekalesia Metotisi i Piula, o lona tausaga muamua lea i le Kolisi, sa faituuaga mai i lona aiga i Kalaiesetete i vaitaimi o aso malolo lea ua toe taliu le uto i le laumua o Piula mo le toe amatalia o le faamoemoe.
O le alii a‘oa‘o o Mighty na soifua mai ona mātua o Fereti Taiulu (Sapapalii) ma Litia (Satapuala), ma o le lupe faalele a le matagaluega Addington ae sa uluai fofoa atu i totonu o le matagaluega Kalaiesetete, o ia foi o se uluai tamafanau a lenei aulotu ua saofaga atu i Piula.
E pei ona ta‘ua e le alii a‘oa‘o lona valaauina e ala i le musumusuga a le Atua na oo ifo i lona loto, ma taumafai loa e finau e ala i le suesue ma taumafai e aoga mai lana faifeau i lea vaitau, o Rev Ropeti Enoka a o lei siitia atu le faifeau i Ausetalia.
Sa lē talitonu ona mātua ona o le utiuti o le taimi a o lea o le a alo atu i suega mo Piula, peitai sa mautu le taofi o Mighty i lana moemitiga, ma ua tau lau o le faamoemoe ua faamanuiaina mo le Kolisi i lona tausaga muamua 2010.
Na faalauiloa mai e le a‘oa‘o i le tusitala, i totonu o le uluai tausaga o loo tumu i Faaaliga o le Atua, o loo vaaia ai e lē aunoa Lona alofa ma le mana galue o le Agaga Paia ia te ia, na mafai ai ona ia lavātia ma onosaia tiga ma faigata a o iai i totonu o le laumua.
Sa faigata ia te ia le gagana Samoa, ae o le taimi nei ua matuā lagona le tele o le suiga ma faatumauina ai pea lona ola faatuatua i le Atua auā e leai se mea e faigata ia te Ia.
Ua vaaia foi le suia o lona tino lapoa, masalo ona o le tele o feau ma tiute e pei ona masani ai le au tausaga muamua.
O le Aso Sa na se‘i mavae atu nei, i totonu o le matagaluega Metotisi i Kalaiesetete sa auai ai le alii a‘oa‘o i sauniga lotu, ma sa faapea ona saunoa faalaeiau le tausi matagaluega Rev Ale Palelei, aemaise le tapuaiga a faifeau malolo Elisara Elisara ma Lasalo Tuilagi, o upu tomatauina ai le alo atu i a‘oa‘oga faapena ma se faamalosiau mo ia.
Ia manatua ai pea mea ua faia e le Atua mo oe ma le loto faafetai, e tofotofoina pea le ola a‘oa‘oina ma le faatuatua i taimi uma, ae ia atamai e pei o le gata ma fifilemu e pei o le lupe.
O le Aso Gafua ua toe taliu ai le uto i Samoa ma e momoli atu ai faamanuiaga a le tausi matagaluega, faifeau malolo ma le matagaluega i Kalaiesetete ina ia manuia tele a‘oga a ana tamafanau i totonu o le Kolisi i Piula.
