Asiasi Hon Phil Goff i le faauuga a le Martin Hautus
16/01/11 || Tusia: Manulelei Coe ||
Pulotu Selio Solomon, Maretta Solomon, Hon Phil Goff, Pulotu Arthur Solomon, Su‘a William Sio, Carol Beaumount
Na maualuga le faamoemoe o le faauuga a le a‘oga a le Martin Hautus, The Pacific Peoples Learning Institute, ina ua faatasi atu o se malo faaaloalogia le afioga i le taitai o le vaega faaupufai malosi o loo agaia le malo, le susuga Phil Goff, o ia foi se uluai taitai mai vaega faaupufai tetele e lua a le atunuu ua asiasi atu i lea polokalame a le Martin Hautus.
Na asiasi atu faatasi le taitai o le Labour ma le afioga i le alii faipule o Magele, Susuga Su‘a William Sio, faatasi ai ma le tamaitai o loo i le lisi o se tasi e tauva mo se tofi faipule a le Labour, le Labour List MP, le tamaitai o Carol Beaumount.
Na muai amata lea aso tāua i sina sauniga puupuu na toe manatua ai i latou e to‘a 29 ua fano o latou soifua i le nofoaga e eli ai le koale i Pike River Point.
Sa lau taitasi suafa o i latou uma e to‘a 29, a o amata ona faamumū moliga‘o e 29 na faailoga ai i latou taitoatasi, a o faalogoina le mālie o le tāina o le musika “Our Father” e pei ona usuina e se tasi o tagata ta‘uta‘ua i musika, le alii o Andrea Bocelli.
Faaalia le agaga faagaeetia o le afioga i le faatonusili, o le Pule Aoao foi lea o le Martin Hautus, le susuga Pulotu Arthur Solomon, ina ua mafai ona faatasi atu le taitai o le vaega faaupufai i la latou sauniga faapitoa.
Saunoa Pulotu, ‘ua maualuga lo matou faamoemoe i le asō ina ua e faaavanoa se taimi mai le tele o ou tiutefai, ina ia e susū mai se‘i e molimauina nisi o auaunaga o loo matou faia mo i latou ua tino i ai lenei tautua’.
Na momoli faamanuiaga a le susuga Phil Goff i le Martin Hautus i le atoaga o le 21 tausaga o lana auaunaga; e lē gata i lea sa agai foi se tautalaga a Goff i le ‘au aooga, ma ia ta‘ua le tāua tele o le lelei o a‘oa‘oga, ina ia lava tāpena mo le lumanai.
Sa faatepa e Goff le fanau faauu i le tele o avanoa lelei tau a‘oa‘oga ua latou maua i o latou nei vaitaimi, pe a fua atu i ona ia vaitaimi ina ua uma ana aoga, ma e tatau ai ona latou faaaogā lelei na avanoa.
Na maua foi le avanoa e saunoa ai le afioga Su‘a William Sio, i le tāua o le nofo sauni ma tapenapena i taimi uma, auā e lē iloa lava le taimi e tulai ai se valaaulia mo se avanoa e faatino ai mea na a‘oa‘oina i le potu aoga.
Na faaiu i le manuia le sauniga mamalu i lea aso, ma taape ai le aofia e lē gata i le ‘au faauu a o aiga ma uo na aofia potopoto, ua faamalieina i le maopoopo ma le saunia lelei o polokalame a le Martin Hautus.
