Faaeaina le taumafai o le tina matua ia Tailoloto Tusa i le faailoga o le Bachelor of Teaching Early Childhood Education

E ese le matagofie o le tagata matua ae tauivi malosi i le sailiga o le atamai faaonapo nei. O le vaiaso ua tuanai na faaiuina ai le taumafai o le tina matua ia Tailoloto Tusa o Porirua, ina ua faailogaina e le fanau ma ona aiga lona faauuga ina ua mae‘a ana taumafaiga mo le sailia o le faailoga o le B.Tchg. ECE. i totonu o le Iunivesite o Vitoria i le laumua nei o Ueligitone.

O Tailoloto Tusa ua 67  tausaga o lona soifua, peitai e lei faavaivai ai lana punouai mo le sailiga o le faailoga, e ui ina sa tele luitau faaleatamai na feagai ma ia, ua lē gata ina ua matua, ae ona o le gagana foi, e lei faia a‘oa‘oga i le gagana Samoa.

O lenei tina e mai le afioaga o Samatau, ma o le tausi i le fetalaiga ia Timu Tavita Tusa mai le afioaga o Faleseela, Safaatoa Lefaga. O se tasi o alo o nei mātua, o Hana, e faiaoga i totonu o le Kolisi a Mana i Porirua lava.

O Tailoloto o se tasi o faiaoga o le Ketesemane Aoga Amata ma ua ia taumafai lava e tuli ia maua le faailoga, auā le usitaia o le tulafono a le malo ina ia oo atu i le 2012 ua maua uma faailoga o i latou e faiaoga i aoga a tamaiti mai le pepe e oo i le 5 tausaga. O Tailoloto foi o se sui faamaoni ma lagolago tele i le F.A.G.A.S.A. le faalapotopotoga mo mātua ma faiaoga auā lava le lagolagoina o le faaaogāina o le gagana ma aganuu Samoa i totonu o Aoga Amata, Tulagalua, Kolisi ma Iunivesite i Aotearoa.

O se lu‘i tele lea ma le aogā i tagata matutua, ina ia ‘aua le manatu faapea ua lē mafai ona fai le aoga ona ua matutua. Ua tonu ai lava le susuga i le faifeau malolo manumalo o Kenape Faletoese i se tasi o ana saunoaga: “E te maliu lava o a‘oa‘oina oe” (You will die learning).

E momoli tele atu ai faamanuiaga a le Sooatulau faapea le F.A.G.A.S.A. i lau susuga Tailoloto Tusa mo lou faailoga ua faaeaina ai oe ona o lou filigā faamaoni.