Faafiafiaina mātua i taumafaiga a le afafine
4/08/10 || Tusia: Rosa Tamala Fiu ||
O le faamanuiaina o le tamaitai o Tanya Rosemarie e pei ona faauu ai i le Aso Lulu o le vaiaso ua tuanai atu, e moni ai upu o le Tusi, ‘O le tama ma le teine poto na te faafiafia i lona tamā ma lona tinā. E faafeao lava oe e le poto’.
Na faatumulia le Broncos League Club i uo ma aiga aemaise mātua faapea le susuga i le faafeagaiga ia Pr Samuelu ma le faletua ia Emma Afamasaga (Kingston SDA) i le molimauina o le iuga o taumafaiga a Tanya Rosemarie. Sa auai mai foi si ona uncle mai Niu Sila, le susuga ia Vaili Leulusoo ma le tina o lona tamā mai Samoa, le tina matua ia Maupenei Parker.
O nisi o faailoga sa faauuina ai o ia, o le Master of Law, sa ia amata mai i le 2009 ma faauu ai ia Iulai 2010. O loo ia umia foi ni faailoga e pei o le Bachelor of Business (Accountancy) ma le Bachelor of Law.
O nei faamanuiaga o ni sikolasipi mai le malo o Ausetalia lea sa sueina uma i le (QUT) Queensland University of Technology sa ia tauaveina uma ai i le taimi e tasi mai le 2003 i le 2007 faaailoga nei (Double Degree) o le Bachelor of Business (Accountancy) ma le Bachelor of Law.
O nisi o mataupu sa ia tauaveina i le Iunivesite o Kuiniselani e aofia ai le Corporate Insolvency, Civil Litigation, Human Rights and Anti-Discrimination Law, Principles of Criminal Evidence, Federal Criminal Law, Comparative Criminal Law, Counter-Terrorism & Public Security Law & Criminal Law & Indigenous Australians.
O le faamoemoe autū lava lenei o Tanya Rosemarie faato‘ā 24 ona tausaga ia Iuni 2010, e pei ona faigaluega ai nei o ia i le Matagaluega o Leoleo i Kuiniselani, (Commissioner’s Legal Advisor’s officer) o le fia maua lea o nei faaailoga taualoa e fesoasoani ai i lana galuega ma le isi tapulaa o lona olaga tuputupu a‘e o loo tulimatai pea i ai a o iai i lona olaga fia a‘oa‘oina.
E lē gata ai i lea le fia suesue atili auā e iai le faamoemoe e fia sueina foi lona faailoga o le (Doctorates of Law).
O ona tuaa o le afioga i le matua ia Toilolo Toetu Lemuelu Parker (Safotu, Salelologa ma Taga) ma si ona tinā ia Silia Lemduelu Parker mai Saleaumua Aleipata.
Malo le tauivi ma le sogāsogā Tanya Lemuelu Parker.
