O upu lava o le Tusi ua puupuu ma saasaa aso o lenei olaga, ae o le pipii lava i le taula e mautu ai le faamoemoe. Ua tatau lava ona sauni uma tagata ina ne‘i pei se isi o aso o Noa sa taualaga e fau le vaa ae faifai, peitai e iai le talitonuga, e faavae lava Samoa i le Atua.

O le toe faaopoopoina o se isi ekalesia fou, e iloa ai le tupu ma le ola o se aulotu poo se ekalesia, e pei ona filigā ai susuga i faafeagaiga o loo tala‘iina ma tauasuina le vai o le soifua i le laveaina o agaga mo le malo o le Atua.

E iai lava le manatu poo fea lava le ekalesia e tautua ai ma auauna ai i le Atua, ae a tumau ma faamaoni, talitonu, loto faamagalo, lotomaulalo ma onosai i tiga o le soifuaga nei, e faapaleina pe a afio mai Iesu.

Na malaga mamao mai lava i Samoa le taitai aoao o le Ekalesia Worship Centre, le susuga ia Ps Viliamu Mafo‘e ma le faletua ia Lavina auā le tatalaina aloaia o se ekalesia i le nofoaga o Skylark i Inala e faaopoopo i ekalesia e 8 o iai i le taimi nei i Brisbane, faapea le susuga i le failautusi aoao a le ekalesia o loo alaala i Sydney, le susuga ia Ps Moala Siliva Moala.

Na tauaofia uma ekalesia aemaise ē sa valaaulia i le taeao o le Aso Sa, aso 6 o Iuni e molimauina lea faamoemoe tāua. Sa logo mālie se upu faamalosi sa saunoa i ai lana auauna e luitau ai i nei toa o le a amataina le ekalesia fou, lea o le a latou faaaogāina pea le hall a leoleo poo le PCYC i Inala i Aso Sa taitasi mo a latou tapuaiga.

O le taimi nei o le taitaifono a Brisbane o le susuga ia Ps Frank Harder o loo la tausia ma le faletua le ekalesia i Redcliff i le itu i Mātū.

O le ekalesia i Gemside o loo nafa ma le susuga ia Ps Musika Niupulusū ma le faletua. O le ekalesia i Calamvale, o loo tausia e Ps Rikisone Uelese ma le faletua.

O le ekalesia i Narangba, o loo tausia e Ps Lance Solo ma le faletua. O le ekalesia i Inala, o loo tausia e Ps Fausia Itamua ma le faletua. O le ekalesia i Goodna, o loo tausia e Ps Toetu Atonio ma le faletua.

O le ekalesia i Logan, o loo tausia e Ps Anthony Mauinatu ma le faletua. O le ekalesia i Acacia Ridge, o loo tausia e Ps ‘Ulu Tofaeono ma le faletua.

O le ekalesia i Sky Lark i Inala, o loo tausia e Ps Tafesilafa‘i Samuelu Namulau‘ulu ma le faletua, ma le ekalesia fou lea ua faaopoopo ma ua 9 ai nei ekalesia a le Worship Centre i totonu o Brisbane.

O le tofa ia Manuleleua Poulava Sam Mata‘utia mai Vaimoso sa fai ma fofoga o aiga o le faafeagaiga ia Ps Tafesilafa‘i ma le faletua e tusa ai ma faaaloalo masani, o le tofa foi ia Poulava ma le faletua ia Lorna Mata‘utia o le Uncle Sam’s Catering sa tapenaina le fofoga taumafa.
Na sao ma uli fuafuaga uma auā le faamoemoe o le ekalesia fou a le Worship Centre.
E faamoemoe o le vaiaso nei lava e taliu atu ai le susuga i le ta‘ita‘i aoao ia Ps Viliamu ma le faletua ia Lavina Mafoe i Niu Sila mo le tatalaina o isi ekalesia fou i Niu Sila.