O se tasi o fuafuaga faataoto a le Ekalesia Katoliko i Samoa, o le faia o le mafutaga a le tupulaga talavou pe a mae‘a le faamanatuina o le Malo tutoatasi o Samoa i le masina o Iuni o loo lumanai nei, o se finagalo ua fai ma faatumutumuga i agaga ma loto o le toatele o tupulaga talavou a le Ekalesia i Melepone.
O le ala foi lea na a‘e ai le finagalo o le Mafutaga Katoliko Samoa i le pitonuu o St Albans i Melepone, le Holy Eucarist. E fai sa latou sailiga seleni e ala i le po siva, lea na faataunuuina i le Aso Toonai aso 5 o Me.
Na faatumulia le faamoemoe o le Ekalesia i le mamalu ma le paia o Samoa na afifio atu e lagolagoina ma talisapaia le faatalauula ane a le laulau o le mafutaga, ma le susuga i le fesoasoani tausi Ekalesia.
O se faaaloalo na talisapaia ma le agaga o le faafetai le ma‘au ma le milomilosia e ala i le seleni paia, aua o se fesoasoani tele lenei seleni mo le malaga o loo sauni atu i ai le autalavou a le Ekalesia mo Samoa, e le taumate, o mafutaga nei e atili tapue ai olaga o fanau mo le Atua, ma lautele ai le iloa e le autalavou o talitonuga a le Ekalesia.
O le susuga i le fesoasoani ia Paselio Lemalu ma le faletua ia Imeleta Lemalu o taitai ia o le mafutaga, ae o le laulau a le mafutaga o loo peresitene ai Tuilaepa Iona Coe, ae sui peresitene ma lagolagosua e Falana‘i Pou Tufuga, o le aao tusitusi o Anita Laulua, ma le teu oloa o Seumanu Pafelio Eliepa.
O le sui peresitene sa fai ma fofoga o le aso, ae o le tootoo o Leulumoega Puni Siania, na saunoa e fai ma sui o Samoa na potopoto.
