O le vaiaso nei e faatau atu ai i tua, amata i Niu Sila sosoo ma Ausetalia, le DVD o ata pese fou a Asuao Lealaitagomoa Felise Mikaele ua faaigoaina o le “TAMA A SAMOA SPECIAL” e faailoga ai le 20 tausaga talu ona tusia ma fatuina lenei pese Tama A Samoa.
O lenei pese sa tusia ma fatuina i le pitonuu o Moera i Lower Hutt i Ueligitone, a o faagasolo le taamilosaga o le ipu o le lalolagi i lakapi 1991 i le pitonuu o Moera i Lower Hutt Ueligitone. Sa pueina i le 1992 i Aukilani i le Crescent Recording Studios, ma faatau loa i tua e le kamupani o le Kiwi Pacific Records International, ma le Crescent Records i le Volume 6. Sa maua le faailoga “Gold Disc” i le 1999 ma le Platinum seia oo mai i le taimi nei.
O lenei ata video (MTV) o loo iai saunoaga a le Epikopo Katoliko i Samoa Alapati Mata‘eliga, o le Ao o le Malo, Tupua Tamasese Efi, le Palemia, Tuilaepa Sailele, Rev. Leuatea Sio a o soifua, taitai o le Itu agai, le alii faipule o Palusalue Faapo II, ma nisi o tagata tautaua i taaloga e iai Bryan Williams ma nisi o loo faailoa o latou lagona i lenei pese.
O loo ta‘ua e nisi o le atunuu o le vii lona lua lea o Samoa, auā o loo faaaogāina pea e le mamalu o Samoa i soo se itu o le lalolagi i tapuaiga o soo se taaloga, auā o le pese e lē faatatau na o le Manu Samoa, aemaise o le taimi o le tufatufaina o faailoga i taaloga, Sports Awards.
Sa usuina e le tusa ma le 15 afe tagata Samoa i le malae vaalele i Aukilani i le taimi sa taunuu ai le tatou ‘au le Manu Samoa mo le Ipu o le lalolagi i le tausaga na mavae atu nei. O loo taualuga lava le ata lenei o le “Tama A Samoa” i le video i le usuina lea e le toafitu a le Manu Samoa 7s o le pese.
O loo igi ai le Kitala e le tama o Tom Iosefo ae piki le isi kitala e Alatasi Tupou, Taimi pese le kapeteni o Uale Ma‘i. Matuā tu‘i lava le malū a le tama o Alafoti Faosiliva, Afa Aiono, Paul Perez ma Lolo Lui.
O le āto o Reupena Levasa, Faalemiga Selesele, Taulagi Afamasaga ma Faatoina Autagavaia, ae usu le tama o Robert Lilomaiava, Felise Mikaele, Alatasi ma Tom, a o le fomai o le palagi le Physio e vaaia tino o le ‘au, na matuā faamaopo le pati a le tamaloa a o alofaiva Tama fanau a Samoa i soo se taaloga, aemaise o le taimi muamua o lea ua maimoa ai Samoa i le uluai Samoa o loo taalo i se taaloga e lē masani pe fiafia i ai Samoa, o le SKY DIVING poo le lele i le ea e pei o le superman a o maimoa le afe o tagata tafafao i totonu o Hollywood i Amerika.
E tele ni faamanuiaga a le tusi pese ua maua mai lenei pese, ae o le faamanuiaga mulimuli nei o le faaaogāina lea faasolitulafono e le kamupani tele i le lalolagi i Sydney Ausetalia (MC CANN WORLDGROUP LTD) o le pese mo le faasalalauga faapisinisi a le Mastercard mo le taamilosaga lakapi a lalolagi 2011, lea sa poloaina ai e le faamasinoga a Ausetalia, ia latou totogia atu se vaega tupe i lē e ana le pese ma o loo lesitala ai le copyright o le pese.
E 12 isi ata o lenei DVD, aemaise le ata faamomoi loto, “Tiga o le Alofa” o loo faaaogā ai se tamaitai mai Faleula ma se alii mai Matootua. E iai foi se isi ata o loo faaaogā ai se tamaitai mai Saleimoa, e lua ausiva hiphop o loo faaaogāina mai Leauvaa o le “Respect” ma le “Crewmen”.
E mautinoa e matuā faamalieina lau maimoa i lenei ata e faamanatu ai le 20 o tausaga o lenei pese ua avea ma pese ua faalototeleina ai au Tama Fanau Samoa faapea ma lau tapuaiga Samoa a o latou alofaiva i taaloga i le lalolagi ma lauiloa ai Samoa i le lalolagi.
