E 12 le aufaauu mai le tausaga lua ua mafai ona faamanuiaina lo latou taumafai e ala ile tusipasi ole Associate of Theology ile aoga Tusi Paia lenei ole Ia Malamalama Agape Bible College i Papatoeote, ae to‘a 6 i latou ua mafai ona tauaaoina iai le tusipasi lenei ole Bachelor of Theology ile tausaga 4 poo le au faaiu aso. E toalua susuga i faafeagaiga poo faiaoga o lenei kolisi faafaifeau sa faauuina ai i o la faailoga ole Master of Theology.
O lenei faauuga tele sa faia ile hall ale AOG i Magele ile taeao ole Aso Toonai ua mavae 5 o Novema, ma sa tumutumu ai aiga uo ma ē masani aemaise o ekalesia oloo iai o latou sui ile aoga e molimauina le tauaaoina o tusipasi o i latou sa faauuina.
Sa pepese ma alalaga fiafia le aufaauu, ma vivii ile Atua ona o lea ua tau lau ole faamoemoe sa timuia ma lāina ai ile tele o aso ole tausaga ile fia faalauteleina ole malamalama e ala ile afioga Paia ale Atua.
O loimata ole fiafia ma loimata ole loto ua tumu ile olioli ona ole matautia ole Atua e ou le pule ma le mana ua ausia ai se isi laasaga poo se isi sitepu fou ole olaga taumafai mo le Alii. Ae ose amataga fou foi lea mo le ola galue ile galuega ale Atua aemaise lava ia i latou oloo faaaogāina i totonu o ekalesia ona o nei faamanuiaga ua sasaa mai ua faa‘oaina ai lagona ma manatu ile upu faauuina ale Atua, auā le faaaogāina i totonu o tovine.
Ole susuga ile faafeagaiga ia James Saipani ose tasi o faiaoga ale kolisi o ia lea sa faatulima e faafeiloai le mamalu o Samoa potopoto, ma o ia foi sa taitaiina le viiga. Ole susuga ile faafeagaiga ia Matafala Lesa na ia saunia le tatalo e amataina ai le polokalame, ae o Pastor Muavae Mika na fofogaina le tatalo e faaiu ai le viiga.
Ole aoina ole taulaga poo le foai na saunia lea ele susuga ile fafeagaiga ia Faafetai Vaoga, ae o Rev Dr Benjamin William na saunoa ile saunoaga autu e faafetaia le paia ole atunuu faapea ekalesia aemaise o mātua ma aiga ile lagolago atu. Sa ia unaia sui poo tamaiti aoga e faaaogā le avanoa ma le taimi e faalautele ai le malamalama e ala ile afioga ale Atua. O nisi o lauga autu ole sauniga na tautalagia ai e nisi o sui aoga ni tautalaga e faafetaia ai le galuega a faiaoga sa galulue punouai ai ile tele o tausaga, ma ole alii o Tavita Robertson sa fai ma sui ole aufaauu ile tausaga lua ae ole tamaitai ia Lizzie Tuigamala sa fai ma sui ole tausaga 4. Taualuga nei molimau ile upu faauuina ale Atua lea sa fai ai le susuga ile faafeagaiga ia Rev Dr Ieti Mageo ma avefeau e momolia ma faamalosia loto ole aufaauu, e faaaogā lelei ai le tāua ole aoga i totonu ole ekalesia ma aiga.
Saunoa le faafeagaiga e lē ole mutaaga lea ole olaga, ae ole amataga fou lea ole isi laasaga e agai atu iai le ola finau mo le Alii.
Ole tamaitai o Evelyn Barbara Reed na tolaulauina suafa ole aufaauu, ae ole susuga ile pule aoga le faafeagaiga ia Charles Reed na tauaaoina tusipasi mo i latou.
O Pastor Tilaulelei Kirifi na ia fofoga nisi o faailoga faapitoa mo vasega taitasi, lea sa maua ai ele alii o Tavita Robertson le faailoga ole tulaga muamua ile vasega 2, ae ole tulaga muamua ile au faaiuaso poo le tausaga 4 na sola lea ma le tamaitai ia Lizzie Tuigamala.
Ole faailoga ole tamaitiiti aoga e alualu agai luma lona taumafai (most improve) na maua lea ele alii o Faifaimalie Sauilemau ma o ia foi sa tulagalua ile tausaga 4, ma le faailoga faapitoa ile taitai ole vasega e lē faalogologo tiga ise mea ae faatino lava e ia mea uma mo le aoga na faamanuiaina ai le tamā ia Kelemi Petone.
Lisi Aufaauu Tausaga 2
Associate of Theology
Eseta Vaafusuaga Faumui
Reopoamo Ioane
Asoono Leituala
Matamua Ianuari Manulua
Halefoti Mapuilesua
Alae Meleisea
Tavita Robertson
Talaula Sola
Tony Tagaloa
Aaron Tuimauga
Guilherme Rodrigues Pereira
Elaine Rodrigues Pereira.
Bachelor of Theology
Talaula Fakaua
Kelemi Petone
Faifaimalie Sauilemau
Nuu Seumanutafa
Lizzie Tuigamala
Mose Tuimauga
Master of Theology
Ps Kalevaria Tuigamala
Ps Malele Isaia
